Qoljetimdi turǵyn úımen qamtylady

Shyǵys Qazaqstan oblysy ákimdigi men Turǵyn úı qurylys jınaq banki Shyǵys Qazaqstan turǵyndaryn qoljetimdi turǵyn úımen qamtamasyz etýge tize qosty. Jýyrda О́skemen qalasynda oblys ákimi Danıal Ahmetov, «Qazaqstannyń turǵyn úı qury­lys jınaq banki» AQ basqarma tóraǵasy Aıbatyr Jumaǵulov jáne «Ertis» ÁKK» UK» AQ bas­qarma tóraǵasy Manarbek Sapar­ǵalıev Shyǵys Qazaqtan oblysynda turǵyn úı qurylysyn salý boıynsha úshjaqty memorandýmǵa qol qoıdy. Taraptar óńirde turǵyn úı qu­­­rylysyn salýǵa, ınfra­qurylymnyń damýyna, sondaı-aq oblys turǵyndaryn sapaly áleýmettik baspanamen qam­tamasyz etýge múddeli ekenin bildirdi. Ekonom-klastaǵy úılerdiń qurylysy qurylys salýshynyń, oblystyq bıýdjet qarjysynyń esebinen jáne memlekettik-jekemenshik seriktestik qaǵıdaty boıynsha qarjylandyrylmaq. Ákimdik qurylysqa qajet jer telimin berýdi, ony ınjenerlik ınfraqurylymdarmen qamta­masyz etýdi, jobalyq-smetalyq qujattardyń ázirlenýin jáne túzetilýin baqylaýdy óz moıny­na almaq. Turǵyn úı qury­ly­syna tapsyrys berýshi já­ne uıym­dastyrýshy retinde «Ertis» áleýmettik-kásipkerlik korporasııasy» ulttyq kompanııa­sy» AQ iske kirispek. Al Turǵyn úı qurylys jınaq banki bolsa, turǵyn úıdi satyp alýshylar pýlyn qurady. Aza­mattardyń turǵyn úı qurylys jınaǵy esebinen turǵyzylǵan baspanalardy ótkizetin bolady. Sonymen qatar, qurylys salýshylardy qarjylandyrý úshin ekinshi deńgeıli bankterge shartty depozıtterdi ornalastyrý arqyly, bank qurylysty qarjylandyrýǵa nıetti. Osy­laısha, qurylys kompanııalary tómengi mólsherlememen kredıtke qol jetkizedi. Bul aımaqtaǵy qurylys salasynyń damýyna serpin bermek. Málimet úshin. Baǵdarlama júzege asyryla bastaǵannan beri  Shy­ǵys Qazaqstan oblysyn­da, «Qol­jetimdi turǵyn úı-2020» baǵ­dar­­lamasy aıasynda, «Halyqtyń barlyq sanatyna arnalǵan turǵyn úı» baǵyty boıynsha jalpy aýdany 110 myń sharshy metr bolatyn 1 810 páterli 25 turǵyn úı qurylysyn salý jáne ony ótkizý jóninde yntymaqtastyq týraly kelisimge qol qoıyldy. Búgingi kúni jalpy aýdany 59 myń sharshy metr bolatyn 949 páterli 15 turǵyn úı paıdalanýǵa berildi. Qol qoıylǵan yntymaqtastyq týraly kelisimge sáıkes, aýdany 59 myń sharshy metr bolatyn 949 páterli 10 tur­ǵyn úıdi paıdalanýǵa berý josparlanyp otyr. Buǵan 5 378 mln. teńge jumsalmaq. Baǵdarlama qolǵa alynǵaly beri ShQO ákimdigine satyp alynǵan páterler úshin 4 306 mln. teńge aýdaryldy. 2015 jyldyń alǵashqy jarty jyldyǵynda 811 mln. teńge aýdarý josparlanyp otyr. «Jas otbasyǵa arnalǵan tur­ǵyn úı» baǵyty boıynsha jalpy aýdany 32,4 myń sharshy metr bolatyn 542 páterli 7 turǵyn úı qurylysyn salý jáne ony ótkizý jónindegi yntymaqtastyq týraly kelisim jasaldy. Byltyr jalpy aýdany 6,4 myń sharshy metr bolatyn 107 páterli 2 turǵyn úı paıdalanýǵa berildi. Esterińizge sala ketsek, «Qa­zaq­stannyń turǵyn úı qu­­rylys jınaq banki» AQ «Báıterek» ulttyq basqarýshy holdıng» AQ-tyń en­shiles kompanııasy bolyp tabylady. Holdıngti qurýdaǵy maqsat – ekonomıkanyń damýyna jáne ony ártaraptandyrýǵa, klas­terlerdiń damýyna jáne enshiles kompanııa­larynda kor­pora­tıvtik basqarý júıesin je­til­­dirýge yqpaldastyq jasaý. Mıra KARIMOVA.