Senat tóraǵasy Máýlen Áshimbaev bastaǵan Atom elektr stansasyn salýdy qoldaý jónindegi Halyq shtabynyń músheleri keshe Almaty oblysyna bardy. Shtab quramynda depýtattar, sarapshylar, qoǵam qaıratkerleri bar. Olar óńirde kásiporyn ujymdarymen, kásipkerlermen jáne jergilikti jurtshylyqpen kezdesip, elimizde AES salýǵa qatysty referendým ótkizý máselelerin talqylady.
Máýlen Áshimbaev oblys jurtshylyǵymen kezdesýde Memleket basshysynyń AES salý máselesine qatysty jalpyulttyq referendým ótkizý týraly bastamasynyń mańyzyna nazar aýdardy. «Búgin Prezıdent Qasym-Jomart Kemeluly Toqaevtyń AES salý máselesi boıynsha jalpyulttyq referendým ótkizý týraly bastamasyn talqylaýǵa arnaıy kelip turmyz. Mundaı mańyzdy máseleni daýysqa salý «Halyq únine qulaq asatyn memleket» tujyrymdamasynyń jarqyn kórinisi ekeni sózsiz. Bul rette ár azamattyń daýsy úlken mánge ıe. Sondyqtan eldiń bolashaǵy úshin durys sheshim qabyldaýymyz kerek», dedi M.Áshimbaev.
Sonymen qatar shtab músheleri «Green Land Alatau» jylyjaıynda ótken kezdesýde otandyq kásiporyndardy energııamen turaqty qamtamasyz etý máselesine basa mán berdi. Qazirgi tańda eldiń energetıkalyq sektory negizinen kómir elektr stansalaryna táýeldi. Sondyqtan senimdi jáne qaýipsiz energııa kózi aýyl sharýashylyǵy taýaryn óndirýshilerdiń turaqty damýy úshin de asa mańyzdy ekeni sóz boldy.
О́ńirdegi shaǵyn jáne orta bıznes ókilderimen kezdesý barysynda Senat tóraǵasy jańa jumys oryndaryn ashýdyń, iri jobalardy iske asyrýǵa yqpal etetin ınfraqurylymdy damytýdyń mańyzyna toqtaldy. Sondaı-aq ǵylymı-tehnıkalyq progrestiń, energetıkadaǵy ınnovasııalyq tehnologııalardyń, joǵary tehnologııalyq sektordyń jáne elimizdegi ǵylymı zertteýlerdiń mańyzy da áńgimege arqaý boldy.
Almaty oblysyna sapar aıasynda Halyq shtabynyń músheleri Sh.Shókın atyndaǵy Qapshaǵaı GES-niń qyzmetimen tanysyp, stansa mamandarymen, basshylyǵymen energetıka salasyn damytý keleshegin talqylady.