Astana qalasynyń Jastar saraıynda kúzgi áskerge shaqyrý naýqanynda Otan qorǵaýǵa nıettengen azamattardy saltanatty túrde shyǵaryp salý rásimi ótti. Er azamattardyń alǵashqy legi Shekara qyzmetine attandy, dep habarlaıdy Egemen.kz QR Qorǵanys mınıstrligine silteme jasap.
Is-sharaǵa Astana qalasy ákiminiń orynbasary Erik Meıirhanov, Qarýly kúshter Bas shtaby Uıymdastyrý-jumyldyrý jumystary departamentiniń bastyǵy polkovnık Farhat Qurmanǵajınov, UQK Shekara qyzmetiniń ardagerleri, jas sarbazdar men áskerge shaqyrylǵandardyń ata-analary qatysty.
Osy jyldyń kúzinde elordadan 1200-ge jýyq azamatty áskerge shaqyrý josparlanyp otyr.
Qarýly kúshter Bas shtaby Uıymdastyrý-jumyldyrý jumystary departamentiniń bastyǵy ásker qataryna qosylǵan azamattarǵa arnaǵan sózinde merzimdi qyzmetti ótkerý kezinde jigitter qarý-jaraq pen áskerı tehnıkany basqarý mashyǵyn úırenip qana qoımaı, shynyǵyp, shymyr bolatynyn atap ótti.
«Azamattyń áskerı qyzmet ótkerýi mindeti ǵana emes, qasıetti boryshy. Áskerge alynǵan árbir jaýynger Otandy qorǵaýy – óz úıin, týystary men jaqyndaryn qorǵaýy ekenin túsinýi kerek», dedi polkovnık Farhat Qurmanǵajınov.
Elorda ákiminiń orynbasary jınalǵandardy aıtýly oqıǵamen quttyqtap, ásker sapyn tolyqtyrǵandar úshin bul kún – ómir boıy este qalatyn erekshe saltanatty kún ekenin alǵa tartty.
«Áskerı antqa adal bolyp, el aldyndaǵy boryshtaryńdy abyroımen ótkerińder!», dedi Erik Meıirhanov.
Aıta keteıik, 30 áskerge shaqyrylýshy bıyl qurylǵanyna 100 jyl tolatyn Shyǵys Qazaqstan oblysynyń Zaısan shekara basqarmasynda merzimdi áskerı boryshyn óteıdi. Olardyń keıbiri el shebin qorǵaýdy otbasylyq dástúrge aınaldyrmaq oıy da bar.
«Men Ulttyq qaýipsizdik komıtetiniń Shekara qyzmetinde boryshymdy óteıtinime qýanyp turmyn», dedi áke jolyn jalǵastyrǵan áskerge shaqyrylýshy Madııar Joljan.
Is-shara barysynda jas sarbazdar shekarashylardyń qyzmetine arnalǵan kórmemen tanysyp, olardyń kúndelikti ómiri týraly beınerolıkterdi tamashalady. Al «Batyrlar» áskerı-patrıottyq ortalyǵynyń tárbıelenýshileri is-sharaǵa qatysýshylarǵa qoıan-qoltyq urys tásilderin kórsetti. Saltanatty shyǵaryp salý rásimi Ulttyq qaýipsizdik komıteti Shekara qyzmetiniń ansambli daıyndaǵan konsertke ulasty.