2024-2025 oqý jylynda elimizde 3 mln-nan astam bala qosymsha bilim berýmen qamtylady dep josparlanǵan. Bul jalpy bilim alýshylardyń 86,3%-yn quraıdy, dep habarlaıdy Egemen.kz Oqý-aǵartý mınıstrliginiń baspasóz qyzmetine silteme jasap.
Aıta keteıik, búginde elimizde 1 713 mektepten tys uıym ár baǵyttar boıynsha 380 úıirme túrin usynady: ǵylymı-tehnıkalyq, mýzykalyq, kórkem-estetıkalyq, ekologııalyq-bıologııalyq, týrıstik-ólketaný, áskerı-patrıottyq, áleýmettik pedagogıkalyq jáne taǵy basqalary.
Vedomstvonyń habarlaýynsha, respýblıkalyq jáne óńirlik deńgeılerde 15 jobalyq keńse, debattar men ózin-ózi basqarý shtabtary, oqýshylar men stýdentterdiń 20 debattyq lıgasy qurylyp, balalardyń synı oılaý jáne kóshbasshylyq qabiletterin damytýǵa óz úlesterin qosyp jatyr.
«Mınıstrlik qosymsha bilim berý júıesin damytý boıynsha keshendi jumystar júrgizip jatyr. Balalardy saýyqtyrý jáne olardyń shyǵarmashylyq, zııatkerlik áleýetin damytý jónindegi 2024-2026 jyldarǵa arnalǵan jol kartasy sheńberinde 2025 jylǵa deıin aýyldyq mektepterde mektepten tys qosymsha bilim berý uıymdarynyń 1 myń komıýnıtı-ortalyqtaryn ashý boıynsha jumys bastaldy. Qazirgi ýaqytta aýyl mektepterinde osyndaı 468 ortalyq ashyldy. Jalpy 2027 jylǵa deıin 100 qosymsha bilim berý ortalyǵyn ashý josparlanyp otyr», dep atap ótti mınıstrlikke qarasty Tárbıe jáne qosymsha bilim berý departamentiniń ókilderi.Sonymen qatar qazirgi ýaqytta balalar men eriktiler uıymdarynyń qyzmetin jetildirý boıynsha tıisti jumystar júrgizilip jatyr. Bul baǵdarlamanyń taǵy bir mańyzdy tusy - mamandardyń biliktiligin arttyrý. Atap aıtsaq, 3 500-den astam qosymsha bilim berý pedagogi, debattyq klýb jetekshileri, oqýshylar men stýdentterdiń ózin-ózi basqarý uıymdarynyń pedagogteri men úılestirýshileri oqýdan ótken.