Qostanaı oblysynyń respýblıkalyq mańyzy bar joldaryndaǵy kólik qozǵalysy ushqyshsyz áýe qurylǵylarynyń kómegimen baqylana bastady. Oblys prokýratýrasy, TJD, polısııa qyzmetkerleri birlesip qolǵa alyp otyrǵan jańa joba kólik apaty jıi bolatyn jol ýchaskelerinde synaqtan ótti.
Jol qaýipsizdigin qamtamasyz etý is-sharalaryna Polısııa departamenti men Tótenshe jaǵdaı qyzmetiniń drondary paıdalanylady. Ushqyshsyz áýe apparaty 50 shaqyrymǵa deıin bara alady. Jyldamdyǵy saǵatyna 100 km-ǵa deıin jetedi. Jol erejesin buzǵan kóliktiń nómirin 2 shaqyrym qashyqtyqtan anyqtap, jadyna tirkep qoıady.
Tártip saqshylarynyń aıtýynsha, drondar áýede jumys istegen eki kún ishinde ruqsat etilmeıtin jerde qarsy jolǵa shyǵyp ketken 6 júrgizýshi ustalǵan. Onyń bireýi zańsyz jolaýshy tasymaldaýmen aınalysyp júrgeni anyqtaldy. Jol tártibin buzǵandardyń bári alty aı merzimge deıin júrgizýshi kýáliginen aıyrylýy múmkin.
«Mysaly, 15 qyrkúıek kúni tústen keıin kvadrokopter qarsy jolaqqa shyǵyp ketken «Jac Sanray» avtokóligin tirkedi. Jol erejesin buzǵan 35 jastaǵy júrgizýshige qatysty materıaldy polıseıler sotqa foto jáne beınedáleldermen birge jiberdi», deıdi oblystyq PD baspasóz hatshysy Karına Bazarbaeva.
Sonymen qatar drondar qaýipsizdik beldigin taqpaıtyn, jol syzyǵy men jol belgilerin eskermeıtin, kólik júrgizip kele jatyp uıaly telefonmen sóılesetin júrgizýshilerdi de anyqtaıdy.
Oblystyq polısııa departamenti júrgizýshilerdi muqııat bolýǵa, jol qozǵalysy erejelerin saqtaýǵa shaqyrady.
Qostanaı oblysy