Baýyrjan Momyshuly atyndaǵy №53 mektep-lıseıinde belgili dıplomat, memleket jáne qoǵam qaıratkeri, ekonomıka ǵylymdarynyń doktory Saılaý Batyrsha-ulymen kezdesý ótti. «Qara shańyraq» qoǵamdyq birlestiginiń uıymdastyrýymen ótken taǵylymdy is-sharada ǵalym oqýshylarmen syr-suhbat quryp, jıyn sońynda 200-ge jýyq kitap qoryn mektep mýzeıine tabystady.
Jıyn barysynda S.Batyrsha-uly táýelsizdik alar tustaǵy, táýelsizdikten keıingi tartysty dıplomatııalyq qyzmetinen syr sherte otyryp, ulttyq qundylyq taqyrybynda áńgime órbitti. Sonymen qatar B.Momyshulynyń maıdandaǵy erlikterinen bólek, onyń tilge, ulttyq mádenıetke sińirgen eńbekterin oqýshylarǵa áserli baıandady.
«Qazaq halqynyń tarıhynda batyrlyq, namys degen kıeli uǵymdardyń alar orny erekshe. Árdaıym el úshin kúresken, Otanyn qorǵaǵan tulǵalardyń arqasynda halyqtar men memleketter órkendegen jáne saqtalyp keledi. Erjúrek Baýyrjan Momyshuly solardyń qataryna jatady. Meniń Baýkeńmen tanysýym Orta Azııa memlekettik ýnıversıtetinde oqyp júrgen stýdenttik shaǵymnan bastaldy. 1960 jyly Tashkent pedagogıkalyq ınstıtýtynyń úlken akt zalynda eki myńnan astam qazaq jastarymen kezdesý ótti. Onda B.Momyshuly Qazaqstanda qurylǵan, general I.V.Panfılov basqarǵan dıvızııanyń Máskeý úshin shaıqastaǵy erligi týraly aıtyp berdi. Baýkeń ózi týraly emes maıdandas jaýyngerler týraly baıandady. Stýdent jastar yqylaspen qarsy aldy. Meniń alǵashqy alǵan áserim – syrt aıbaryna qaraǵanda, ol kisi qatal minezdi, kóp sóılemeıtin, ashylmaıtyn adam retinde kórindi. Biraq ýaqyt óte kele, Almatyda jıi aralasyp, suhbattasqanymyzdan keıin ol kisiniń ózim degen pikirles adamdarmen, áńgimelesýge turatyn kisilermen ashyq ta adal sóılesetinine kózim jetti», dedi S.Batyrsha-uly.
Memleket múddesi, qazaq tiliniń taǵdyry, ult bolashaǵy sóz bolǵan júzdesýde orys synybynyń oqýshylary da belsendi qatysyp, kókeıkesti saýaldaryn qoıdy. Máselen, Nuraı esimdi oqýshy B.Momyshulynyń kópshilik bile bermeıtin erligi týraly surady.
«Biz kóbinde Baýkeńniń áskerı erligin, jazýshylyq qabiletin, ol kisiniń shynshyldyǵyn, ádilettiligin aıtamyz. Bul – durys. Sonymen qatar qazaq halqynyń aty-jónin jazýdaǵy dástúrli ereksheligin saqtap qalý úlgisin, ulttyq sana-sezimin kóterýdegi eńbegin atap ótý kerek. Máskeýdegi ámirshil-ákimshil bılik bir urpaqtyń ómirinde qazaq halqynyń álippesin úsh ret ózgertti. Sonymen qatar qazaqtardyń basqa Shyǵys halyqtary sekildi atam zamannan kele jatqan atatek ataýlaryn joıyp, barlyq Orta Azııa respýblıkasy halyqtarynyń famılııasyna «-ov, -ev, -ova, -eva», otchestvo qylyp «-ıch, -evıch, -evna, -ovna» jurnaqtaryn kúshtep jalǵap berdi. Baýkeń oqyǵan-toqyǵany tereń bolǵandyqtan, ol ár halyqtyń óziniń dástúrli aty-jónin saqtap qalý quqyǵyn qorǵady. Sóıtip, túrki halyqtaryn orystandyrýdyń jolyna qarsy shyqty, dástúrli aty jáne ákesiniń atynan qurylatyn ataýyn saqtap qaldy (Baýyrjan Momysh-uly – buryn osylaı jazylǵan). Osy másele týraly áńgimeleskenimizde, Baýkeń óziniń dástúrli aty-jónin saqtap qalýdaǵy kóp áreketin jáne qýdalaýǵa túskenin aıtyp berdi. Barlyq qysymǵa qaramastan, qazaq halqy ekenimizdi kórsete biletin «uly» degendi qaldyrýy ol kisige ońaı tımedi», dedi S.Batyrsha-uly.
Sharapatty is-sharanyń uıymdastyrýshysy, «Qara shańyraq» qoǵamdyq birlestiginiń dırektory Turar Sattarqyzynyń aıtýynsha, osyndaı kezdesýlerdiń oqýshylarǵa bereri mol.
«Biz «Ulaǵatty urpaq» jobasy aıasynda mektepterde belgili tulǵalarmen júzdesý uıymdastyramyz. Maqsatymyz – jas urpaqty otansúıgishtikke tárbıeleý, olardyń boıyna ulttyq qundylyqty sińirý. Saılaý aǵamyz da Baýyrjan Momyshulymen alǵash osyndaı kezdesýde jolyqqan. Tulǵalardyń biraýyz sózi oqýshylardyń tańdaýyna áser etip, ómirin ózgertýi bek múmkin. Búgingi uıymdastyrǵan is-sharamyzda otyz baladan bir bala áserlenip, rýhtanyp qaıtsa, bizdiń jetistigimiz sol. Aldaǵy ýaqytta Saılaý aǵamyz syndy ómirde kórgeni mol, aıtary bar tulǵalardy stýdenttermen de jolyqtyryp, syr-suhbat uıymdastyrý josparymyzda bar», dedi Turar Sattarqyzy.