Aqmola oblysynyń polıseıleri joǵalǵan jasóspirimdi Bestóbe kentindegi shahtadan tapty, dep habarlaıdy Egemen.kz.
Polisia.kz-tiń jazýynsha, 17 jasar jasóspirimniń habar-osharsyz joǵalyp ketýi týraly aryz 16 qyrkúıekte Stepnogorsk qalasynyń polısııa basqarmasyna kelip tústi.
Muǵalimder 11-synyp oqýshysynyń sabaqqa kelmegenine baılanysty dabyl qaqqan. Belgili bolǵandaı, jasóspirim 13 qyrkúıekte mektepke barmaǵan. Polısııa qyzmetkerleri dereý qajetti jedel izdestirý sharalaryn bastady. Joǵalǵan jasóspirimniń tanystary anyqtalyp, ata-analary, jaqyn týystary men dostary tergeldi.
Polısııa jas jigittiń Bestóbe aýylynyń aýmaǵynda ekenin anyqtap, shahtanyń tómengi kókjıekterine tústi. 17 qyrkúıekte kámeletke tolmaǵan balanyń ornalasqan jeri anyqtaldy jáne ol týystaryna aman-esen tabystaldy.
Jas jigit altyndy tabý maqsatynda shahtaǵa túskenin túsindirdi. Polısııa qyzmetkerleri jasóspirimniń ata-anasyna qatysty kámeletke tolmaǵandy tárbıeleý, onyń quqyqtary men múddelerin qorǵaý jónindegi mindetterdi, sondaı-aq onyń qaýipsizdigin qamtamasyz etý jónindegi sharalardy oryndamaǵany úshin ákimshilik hattama toltyryldy. Sonymen qatar, kámeletke tolmaǵan balanyń ózi qorǵalatyn obektige zańsyz kirgeni úshin ákimshilik jaýapkershilikke tartyldy.
Polıseıler ata-analardy balalarynyń ornalasqan jerin baqylaýdy kúsheıtýge jáne qaýipsizdik máselelerinde qyraǵylyq tanytýǵa shaqyrady.