Oıyl aýdanyndaǵy kóktemgi sý tasqynynan zardap shekken Aqkemer aýylynyń 16 turǵyny jańa baspanaǵa kirdi. Aýmaǵy 80 sharshy metr bolatyn 3 bólmeli turǵyn úılerdiń qurylysy Eurasian Resources Group (ERG) kompanııasy bólgen qarajatqa salynyp, qurylys jumystaryn «Hause Master Aktobe» merdiger kompanııasy júrgizdi.
Aqkemerdiń qyratynda aq-qyzyl kirpishpen ádemi etip qalanyp, shatyrlary jarqyrap alystan kórinetin jańa aýyldaǵy bir úıdiń quny – 28,5 mln teńge. Saltanatty sharaǵa Oıyl aýdanynyń ákimi Asqar Qazybaev, «ERG» kompanııasynyń ókili, Aqtóbe ferroqorytpa zaýytynyń dırektory Erjan Abdýlabekov, merdiger mekeme basshylary qatysyp, baspana ıelerin jańa qonystarymen quttyqtady. Páter kiltin tapsyrý rásimine jınalǵan jańa qonys ıelerine «Sulpak» elektronıka saýda jelisiniń atynan turmystyq tehnıka sertıfıkattary tabystaldy.
Aıta ketý kerek, sáýirdegi tasqynnan Oıyl aýdanynyń ortalyǵy men Ekpetal, Kemer, Bestamaq, Qaratal aýyldarynda 328 úı zardap shekti. Komıssııa qorytyndysymen materıaldyq zalal kólemi anyqtalyp, qatty zardap shekpegen 21 úı qaıta jóndeýden ótse, turǵyndardyń tańdaýymen ekinshi naryqtaǵy 135 úı satyp alyndy. Al turýǵa múlde jaramsyz, qulap qalǵan úılerdiń ornyna 172 jańa baspana salynatyn boldy.
Jazda negizgi jumystar aıaqtalǵanymen, qyrkúıek – qurylysshylar úshin de qarbalasqa toly. Kún sýytyp, jańbyr-laısań bastalǵansha biraz sharýany aıaqtaý kerek. Osy aıdyń sońyna deıin áli de 13 baspananyń kilti ıelerine tabystalady. «ERG» kompanııasy sý tasqynynan zardap shekken aımaqtarǵa biraz qarajat bóldi. Qıyn-qystaý zamanda qol qýsyryp qarap otyrmaı, biz de úlesimizdi qosaıyq dep sheshtik. Mine, búginde sizderdiń jańa baspananyń ıegeri atanǵandaryńyzdy kórip, tıisti jumystyń nátıjesi dep baǵamdap otyrmyz. Shańyraqtaryńyz árdaıym shattyqqa toly bolsyn», dedi «ERG» kompanııasynyń ókili Erjan Abdýlabekov.
«Aýyl azamattaryna búgingi qýanyshty kúnimiz uzaǵynan bolsyn degim keledi. Osydan birneshe aı buryn aýylymyzdy sý alyp, qınalǵanymyz esimizde. Memleket basshysy halyqqa arnaıy qoldaý bildirip, bizge óz járdemderińizdi kórsetip, qala tıpti úıler salyp bergenderińizge analyq sheksiz alǵysymdy bildiremin», dep Aqkemer aýylynyń turǵyny Jumagúl Nurǵalıeva qýanyshyn bólisti.
Oıyl aýdanynda sý tasqynynan keıingi qalpyna keltirý jumystary qarqyndy júrip jatyr. 172 turǵyn úıdiń qurylysynan bólek, ınfraqurylym, sý tasqynynan zardap shekken kásipkerlik nysandaryna ótemaqy tóleý jumystary da tıisti josparmen júrgizildi. Turǵyndar jańa qonysqa túgel ornalastyrylǵan soń sý shaıǵan aýyl joldaryn jóndeý, bógetterdi nyǵaıtý jáne aýdan ortalyǵyna kireberistegi kópirdi qalpyna keltirý jumysy bastalady. Oǵan qajetti qarajat respýblıkalyq jáne jergilikti bıýdjetten bólindi.
Aqtóbe oblysy