Qalıbek Qýanyshbaev atyndaǵy Qazaq ulttyq mýzykalyq drama teatrynda Qazaqstannyń halyq aqyny, satırık, sazger, jýrnalıst, qoǵam qaıratkeri Qonysbaı Ábildiń 70 jyldyǵyna arnalǵan «Áı-áı» aqyn áldıi» atty eske alý keshi ótti. Mazmundy mádenı is-sharany Astana qalasy Tilderdi damytý jáne arhıv isi basqarmasy uıymdastyrdy.
Qart Torǵaıdyń tósinen túlep ushqan tuǵyrly talantqa ónerdiń qaı túri de jat bolǵan emes. Bala kúninen ónerge ǵashyq bolyp ósken óren alǵash oqyrmandarǵa shymshyma ázili bar syqaq óleńderimen, muńly ásem ánderimen tanyldy. Ásirese avtordyń satıra janrynda jazylǵan «Bastaý», «Alańǵasar», «Kórshiler» «Jetpis jetiniń jigitteri» atty jınaqtary synshylar tarapynan joǵary baǵalandy. Qonaǵań jýrnalıstıka salasynda da aıshyqty iz qaldyrdy. Alǵashqy eńbek jolyn aýdandyq gazetten bastaǵan qalamger oblystyq «Torǵaı tańy», odan keıin sol kezdegi «Lenınshil jas» (qazirgi «Jas alash») gazetiniń menshikti tilshisi bolyp, qoǵamdaǵy san alýan ózekti máseleni batyl kóterdi. Keıin qalalyq «Arqalyq tańy» gazeti men Torǵaı oblystyq teleradıo kompanııasyn basqardy.
El talantyna súısingen asyl azamattyń taǵy bir qyry – sýyrypsalma aqyndyǵy. Ol sonaý 80-jyldardyń basynan halqymyzdyń ǵajaıyp murasy – aıtys óneriniń qaıta jandanýyna qomaqty úles qosty. Qonysbaı aǵa basyna úki taqqan bórkisimen sahnaǵa shyǵa kelgende kóz aldymyzǵa qazaq sal-serileriniń beınesin elestetetin. Aıtysta «Torǵaıdyń topjarǵany» Nurhan Ahmetbekovti pir tutty. Ásirese arqaly aqynnyń Kóken Shákeeev, Kókbaı Omarov, Áselhan Qalybekova, Ásııa Berkenova, Qatımolda Berdiǵalıev, Shynbolat Dildebaev, Erik Asqarov sekildi aqtańgerlermen aıtysy tól ónerimizdiń úzdik úlgilerine aınaldy.
Sondaı-aq Qonysbaı Ábil Astana – bas shahar bolǵan jyldardan bastap, elordada memlekettik tildi damytý isiniń negizin qalap, ana tilimizdi órkendetý jolynda bel sheship eńbek etti.
Aqyndy eske alý keshi ózgeshe formatta ótti. Bul joly sahnada qalamgerdiń týyndylary ǵana sóıledi. Tek qana Qonaǵańnyń jaqyn serigi, kórnekti aqyn, Memlekettik syılyqtyń laýreaty Ulyqbek Esdáýlet dosy týraly jyly esteligimen bólisti.
«Adam ómiri mazmuny bólek kitap sekildi. Árkimniń de júrek kitaby bar. Qonysbaı aýzyn ashsa júregi kórinetin jigit edi. Janynyń keńdigi birde saıyn dalaǵa, endi birde asqar taýǵa uqsaýshy edi. Onyń satırasy da, lırıkalyq jyrlary da keremet. Qaı shyǵarmasy bolmasyn, ómirdiń ózinen oıyp alynǵandaı oqyrmanǵa áser etedi. San qyrly talant ıesi bolatyn. Kez kelgen mýzykalyq aspapta sheber oınaıtyn. Týǵan jeri – Torǵaıdy erekshe jaqsy kórdi. Astanaǵa qonys aýdarǵannan keıin memlekettik tildiń mereıin kóterýge bar kúshin jumsady. Shyndyǵyn aıtqanda, Qoqańnyń qalaǵa sińirgen eńbegi erekshe. Sondyqtan elordanyń bir kóshesine Qonysbaıdyń esimi berilse, artyq emes», dedi ol.
Kesh barysynda aqynnyń ózi shyǵarǵan ánderi men sózine jazylǵan shyǵarmalaryn Qazaqstannyń Eńbek sińirgen qaıratkerleri Nurlan О́nerbaev, Aıgúl Qosanova, Klara Tólenbaeva jáne Perızat Turarova, Shahrızat Seıdahmet, О́zgeris Sherikbaı sekildi daryndy ónerpazdar naqyshyna keltirip oryndady. Sondaı-aq Arqalyq qalasyndaǵy Qonysbaı aǵanyń izin jalǵaǵan aqyndar mektebininiń ókilderi – Aıbek Qalıev, Toba О́tepbaı, Batyrlan Saǵyntaev ustaz rýhyna arnap jyr tókti. Al Jastar teatry men Á.Mámetov atyndaǵy memlekettik drama jáne komedııa teatrynyń akterleri qalamger shyǵarmalarynan shaǵyn kórinis qoıyp, kórermenderdi jyly áserge bóledi.