Keshe «Astana Operanyń» úlken zaly sahnasynda bekzat óner jankúıerleri tamasha keshtiń kýási boldy. Teatrdyń balet trýppasynyń kórkemdik jetekshisi, álemdik balet juldyzy Altynaı Asylmuratovanyń asqan sheberlikpen qurǵan baǵdarlamasy kópshilik kórermendi tánti etti.
Eki bólimge qurylǵan konsert sahna tórinde san alýan janrdaǵy bı óneriniń jaýharlaryn jarqyrata kórsetti.
– Trýppamyzdyń jazǵy demalystan keıin kórermenderdiń aldyna alǵash shyǵýy bolǵandyqtan biz bul keshke asa yjdaǵattylyqpen daıyndaldyq. Ártisterimiz de kórermenin saǵynyp qalypty. О́zińiz kýá bolǵandaı, baǵdarlamamyzdyń «Nomad Dance Gala» dep atalatyn birinshi bóliminde otandyq talantty da jas baletmeısterlerdiń týyndylary men ulttyq nómirler tanystyryldy. Álbette, kesh premerasyz ótpeıdi. Qazaq ulttyq horeografııa akademııasy daıyndaǵan «Asan men Úsen» kóńildi jańa nómiri balet jankúıerlerine tosyn jańalyq bolǵany sózsiz. Al keshimizdiń ekinshi bóliminde biz XX ǵasyr jaýhary – N.Rımskıı-Korsakovtyń mýzykasyna kemeńger horeograf M.Fokınniń «Sheherazada» baletin usyndyq. Spektaklge arnalǵan ssenografııany úzdik teatr sýretshileriniń biri L.Bakst jasaǵan bolatyn. Ol – Sankt-Peterbýrg pen Parıjde kóp jumys istegen, ótken ǵasyrdyń basynda ekzotıka men orıentalızm ereksheligindegi eýropalyq sán úlgileriniń shyǵarýshysy bolǵan kánigi sheber maman, – dedi «Astana Opera» balet trýppasynyń kórkemdik jetekshisi, Reseıdiń halyq ártisi Altynaı Asylmuratova.
Teatr gala keshte jetekshi solısterdiń, sondaı-aq kordebalet ártisteriniń qatysýymen bolatyn nómirlerdi kórermen nazaryna usyndy. Olar jeke jáne dýette óner kórsetti. Konserttik baǵdarlama «Turan» etno-folklorlyq ansambliniń mýzykasyna qoıylǵan Anvara Sadyqova men Almat Shámshıevtiń horeografııasyndaǵy «Jármeńke» nómirimen ashyldy. Sondaı-aq bul keshte Ámına Kısembaeva men balet ártisteri Anvara Sadyqovanyń taǵy bir avtorlyq qoıylymy – «Steppe Sons» alternatıv-folk tobynyń mýzykasyna qoıǵan «Sarmattyq abyz áıel» nómirin de naqyshyna keltire oryndady.
Al Patrık de Bananyń qoıylymyndaǵy «Dala úni» baletinen adajıony Qazaqstannyń eńbek sińirgen qaıratkeri Aıgerim Beketaeva men Ǵalymjan Nurmuhamet, Oljas Tarlanov pen Ásel Shaıkenovanyń tamasha tandemi tanystyrdy. Sonymen qatar mazmundy baǵdarlamaǵa ataqty baletmeısterdiń horeografııasyndaǵy taǵy bir jarqyn nómir – «Turan» etno-folklorlyq ansambliniń mýzykasyna qoıylǵan «Qıly zaman» nómiri engizilip, ony Sultanbek Ǵumar kásibı joǵary deńgeıde oryndap shyqty. Ǵajaıyp ári qyzyqty ulttyq nómirdi elordalyq kórermender asa zor yqylas hám tolassyz qoshemetpen qarsy aldy.
Eki kún qatarynan kórsetilgen bul gala keshte kórermen qaýym ártisterdiń qos quramynyń da sheberligine baǵa berýge tamasha múmkindik aldy. Ásirese kópshiliktiń kóńilinen shyqqan jarqyn balet – «Sheherazadany» qos quram oıynynda salystyra tamashalap, shynaıy baǵa berýdiń sáti de osy joly tústi. Atap aıtsaq, aıtýly spektaklde Altyn quldyń basty partııasyn Serik Naqyspekov pen Qazaqstannyń eńbek sińirgen qaıratkeri Baqtııar Adamjan oryndasa, Zobeıdany Qazaqstannyń eńbek sińirgen qaıratkeri Aıgerim Beketaeva men Anastasııa Zaklınskaıa tanystyrdy. Sózsiz, bul gala kesh balet maýsymynyń eń jarqyn oqıǵalarynyń biri bolǵany anyq.
Maýsymashar konserttiń taǵy bir erksheligi ótken teatr maýsymynda baletmeısterlik qyrymen de kópshilik kórermenniń yqylasyna bólngen solıst Sultanbek Ǵumar bul keshte «Mangurt» jáne «Rýh» dep atalatyn qos týyndysyn usyndy. Olardy Nıma Tokov, Kamıla Ormanova, Islam Qaıypbaı, Aıdan Qaljan jáne «Astana Opera» ártisteri sátti oryndap shyqty. Odan bólek, aıtýly balettik jarqyn baǵdarlamada Ǵazıza Moldahmettiń oryndaýynda «Syǵan bıi», Qazaqstannyń eńbek sińirgen qaıratkeri Ánel Rústemova men Jaqsylyq Saýqymbekovtiń ınterpretasııasynda «Ańsaý» nómirleri tanystyryldy. Qoryta aıtqanda, «Nomad Dance Gala» keshi elimizdegi horeografııa óneriniń biregeı stılin izdeýge degen talpynysty ǵana kórsetip qoımaı, sonymen qatar otandyq baletti jańa hám anaǵurlym joǵary deńgeıge kótergeni sózsiz.