Egıpettiń Aleksandrııa qalasynda ótken IOI-2024 halyqaralyq ınformatıka olımpıadasynda Qazaqstan quramasynyń qorjyny taǵy tórt medalmen tolyqty. Jyl saıyn dástúrli túrde ótetin bul bilim báıgesi bıyl otyz altynshy ret uıymdastyrylyp otyr. Dúnıejúzilik ınformatıka saıysyna osy jyly 96 elden 350 oqýshy qatysyp, baq synaǵan. El namysyn qorǵaǵan bizdiń oqýshylarymyz úsh kúmis pen bir qola medalǵa qol jetkizip, júz paıyz nátıje kórsetti.
Qatysýshy elder sany boıynsha atalǵan bilim básekesi halyqaralyq matematıka olımpıadasynan keıingi ekinshi úlken ǵylymı saıys. Elimizdiń qurama komandasy ınformatıka jarysyna bıyl jıyrma jetinshi ret qatysyp otyr.
Bıyl úzdik nátıje kórsetken Qazaqstan komandasynyń quramynda Atyraý oblystyq №1 «Bilim-Innovasııa» lıseı-ınternatynyń 11-synyp oqýshysy Mansur Taımas, Almaty qalasyndaǵy Respýblıkalyq fızıka-matematıka mektebiniń 10-synyp oqýshysy Maksım Soı, Almaty qalasyndaǵy Respýblıkalyq fızıka-matematıka mektebiniń 11-synyp oqýshysy Nazar Serazıtdınov, Qyzylorda oblystyq «Bilim-Innovasııa» lıseı-ınternatynyń 10-synyp oqýshysy Ahmet Isa bar.
«Atalǵan baıqaý eki kúnnen turady, onda qatysýshylarǵa algorıtmdik esepterdi sheshý jáne baǵdarlamalaý tapsyrmalary berilgen. Oqýshylar jeke dara baq synaıdy. Aıta keterligi, ár elden ózderiniń ulttyq olımpıadalarynda jeńimpaz atanǵan tórt oqýshy qatysady. Qazir halyqaralyq deńgeıdegi bedeldi 7 olımpıada bar. Olar matematıka, fızıka, hımııa, ınformatıka, geografııa, lıngvıstıka, bıologııa pánderinen jyl saıyn ótedi. Sonyń biri – halyqaralyq ınformatıka olımpıadasy. Atalǵan bilim báıgesi alǵash ret 1989 jyly ótti. Al Qazaqstan qurama komandasy bul saıysqa 1998 jyldan beri qatysyp, 3 altyn, 27 kúmis jáne 41 qola medalǵa qol jetkizdi», deıdi Daryn respýblıkalyq ǵylymı-praktıkalyq ortalyǵy dırektorynyń orynbasary Nurlan Jumageldi.
Bul jetistikpen oqýshylarymyz bıylǵy jeti bedeldi halyqaralyq olımpıadalarǵa qatysýyn qorytyndylaıdy. 2023-2024 oqý jylynyń nátıjesi boıynsha elimizdiń ulttyq quramasy IMO (matematıka), IPhO (fızıka), IBO (bıologııa), IChO (hımııa), IOL (lıngvıstıka), IGeO (geografııa) jáne IOI (ınformatıka) saıystaryna qatysyp, 2 altyn, 12 kúmis, 12 qola medal jáne bir dıplomǵa ıe boldy.