Jıyrmadan astam aǵylshyn tiliniń muǵalimi men sala basshylary brıtanııalyq áriptesterimen kezdesip, úzdiksiz kásibı damý júıesiniń ozyq úlgilerimen tanysty.
Qazaq-Brıtan úkimetaralyq komıssııa otyrysynda aǵylshyn tili pánin tıimdi oqytý máseleleri aıtylǵan edi. Arnaıy qurylǵan jumys toby ǵylymı zertteýler júrgizip, usynystar bildirdi. Solardyń biri – elimizdegi muǵalimderdiń úzdiksiz kásibı damýy úshin ozyq brıtanııalyq ádistememen tereńirek tanysý jobasy boldy.
«Áriptesterimizdiń tájirıbeleri, árıne, álemge tanylyp jatyr. Jańa aqparatty osy kisilerden alyp, ózimizdegi máselelerdi tıimdi sheshý úshin osynda kelip otyrmyz», dedi Oqý-aǵartý mınıstrligi orta bilim komıtetiniń basqarma basshysy Álııa Chokýsheva.
Jıyrma eki adamnan turatyn delegasııa quramynda joǵary oqý oryndarynyń basshylarynan bastap, aýyl muǵalimderine deıin bar. Shaqyrýshy tarap – Ulybrıtanııa halyqaralyq saýda departamenti jáne Brıtan keńesi. Olar úzdiksiz kásibı damý júıesi boıynsha paneldik pikirtalastar ótkizip, mektepter men ýnıversıtetterge saparlar uıymdastyrdy.
«Ulybrıtanııa muǵalimder daıyndaýda óte qatań álemdik standarttardy ustanady. Biz úzdiksiz kásibı damý máselesine erekshe mán beremiz. Osy bilimimizdi qazaqstandyq áriptesterimizben bólisýge daıynbyz», dedi London ýnıversıteti, Kommýnıkasııa jáne qoǵam mektebiniń basshysy Lıvııa Mateı.
Sapar barysynda muǵalimderdi sertıfıkattaý, olar úshin biliktilikti arttyrý kýrstaryn uıymdastyrý jáne mektep basshylary men ádiskerlerdi qoldaý máseleleri de basty nazarda boldy. Úzdiksiz kásibı damýdyń tıimdi joldaryn úırený úshin otandyq pedagogter brıtanııalyq áriptesterimen tyǵyz baılanys ornatty.