Jetisý aýyldary birtindep kógildir otynǵa qol jetkizip jatyr. Talaı jyldan beri kezek kútken Tekeli jurty da bul ıgilikti tutyna bastady. Búginde oblystyń 300 myńnan astam turǵyny gazǵa qol jetkizgen. Bıyl taǵy 27 eldi meken jyl sońyna deıin gazdandyrylady.
Tekelidegi «Dostyq» shaǵyn aýdany turǵyndary kógildir otynǵa birinshi bolyp qosyldy. Ol jerde 1 200 abonent bar. Tabıǵı gazǵa Eskeldi, Qaratal aýdandarynyń birneshe aýylynyń turǵyndary da qol jetkizdi. Kógildir otyn 1 700-den asa adam turatyn О́tenaı, Jańalyq, Ortatóbe aýyldaryna berildi.
«Eskeldi aýdanynda 33 eldi mekenniń 21-i gazdandyrýǵa jatady. Onyń 10-y búginde gazdandyryldy, 9 eldi mekende gaz taratý jelilerin salý jumystary júrip jatyr. Qaınarly aýylyna gaz taratý jelileriniń qurylys-montajdaý jumystarynyń konkýrstyq prosedýralary aıaqtaldy. Jalǵyzaǵash aýylyn gazben qamtý boıynsha jobalyq jumystar júrgizilip jatyr. Sonyń nátıjesinde 2025 jyly atalǵan barlyq joba iske asyrylǵannan keıin aýdan 100% gazdandyrylady», dedi aýdan ákiminiń orynbasary Aıdyn Isabekov.
Qaratal aýdany týraly aıtatyn bolsaq, búginde Kókdala, Dostyq, Qanabek, Jańatalap, Kálpe, Oıan, Bastóbe, Ortatóbe aýyldarynda gaz taratý jelileriniń qurylysy aıaqtaldy. Úshtóbe qalasy turǵyndarynyń 40%-y nemese qalanyń batys bóliginiń 8 myńnan asa turǵyny kógildir otynǵa qol jetkizdi. Jyl sońyna deıin 11 myńǵa jýyq adam turatyn qalanyń qalǵan shyǵys bóligin de gazben qamtý josparlanǵan. Sonymen qatar aýdannyń 5 aýylynda gazdandyrý jumystary júrip jatyr. Bul eldi mekenderdi gazǵa qosý jyl sońyna deıin kezeń-kezeńimen júzege asyrylady. Aýdan 2025 jyldyń sońyna deıin tolyq gazdandyrylady.
Oblystyq Energetıka jáne turǵyn úı-kommýnaldyq sharýashylyǵy basqarmasynyń málimetine súıensek, Eskeldi aýdanynyń eldi mekenderi men Tekeli qalasyn gazdandyrý úshin 2018 jyly uzyndyǵy 31,3 km «Taldyqorǵan-Tekeli» joǵary qysymdy gaz qubyry salynǵan.
Búginde oblystaǵy gazdandyrý deńgeıi – 47,6%, al jyl sońyna deıin bul kórsetkish 50%-dan asady. 2025 jyldyń sońyna deıin óńirdiń 506,6 myń turǵyny bar 126 eldi mekenin gazdandyrý josparlanǵan.
Jetisý oblysy