Teatr tarlandary – Ertis-Baıan óńirinde

Júsipbek Aımaýytuly atyndaǵy Pavlodar ob­lystyq qa­zaq mýzyka-drama teat­ryn­da «Ertis-Baıan» I res­pýb­lıkalyq teatrlar fes­tı­vali bastaldy. Atal­ǵan teatr basshysy Arman Te­mirbektiń aıtýynsha, óner ujymdarynyń dodasy J.Aımaýytulynyń 135 jyl­dyǵyna arnalyp otyr.

– Respýblıkalyq aýqym­­daǵy festıval Pav­lodar oblysy ákimdi­gi­niń qoldaýymen uıymdas­tyrylýda. Mundaı iri teatrlar syny Ertis-Baıan óńirinde osydan on shaqty jyl buryn ótken eken. Araǵa biraz jyl salyp dástúrli is-shara jalǵasyn tapty. Festıval otandyq teatr ónerindegi úzdik ju­mystardy, zamanaýı teatr úrdisiniń negizgi tendensııa­laryn anyqtaý jáne teatr óneriniń klassıkalyq, zamanaýı muralary arasyndaǵy shyǵarmashylyq baılanys­ty nyǵaıtý, akterlik kásibı deńgeıdi shyńdaý, teatr álemindegi jańa esimderdi anyqtaý maq­satynda qolǵa alynǵan. Elimizdegi eń úz­dik degen spektaklder Pav­lodar tórinde qoıylyp, jergilikti kórermen de ózge akterlerdiń ónerine qaryq bolady degen oıdamyz. Bul festıvaldaǵy negizgi talap – qatysatyn jumystar buryn ózge teatrlardyń sahnasynda qoıylmaýy kerek ári keıingi bir jyl ishinde premerasy ótken bolýǵa tıis. Bul bizdiń ó­zge áriptesterimizdiń arasyn­daǵy básekelestikti arttyra túsedi degen senimdemiz, deıdi A.Temirbek.

Respýblıkalyq syn­ǵa elimizdiń túpkir-túpki­ri­nen 11 teatr, atap aıt­qanda J.Aımaýytuly teatry­­­nan bólek, S.Qo­jam­­­qulov atyndaǵy Uly­taý oblysynyń qazaq mýzy­kalyq-drama teatry, Abaı atyndaǵy Abaı oblystyq qazaq mýzy­ka-drama teatry, S.Mu­qanov atyndaǵy Soltústik Qazaqstan oblystyq qazaq mýzykalyq drama teatry, S.Seı­fýllın atyndaǵy Qa­raǵandy oblystyq aka­­demııalyq qazaq drama teatry, Á.Mámbetov atyn­daǵy memlekettik dra­ma jáne komedııa teatry, Q.Qýanyshbaev atyn­daǵy Qazaq ulttyq mýzy­kalyq drama teatry, Sh.Qu­saıy­nov atyndaǵy Aq­mola ob­lystyq qazaq mýzy­ka­lyq-drama teatry, As­tana qalasy ákimdiginiń Jas­tar teatry, Shyǵys Qa­zaq­stan oblystyq drama teatrynyń Jas kórermen trýppasy, B.Rımova atyn­daǵy Taldyqorǵan drama teatry baǵyn synap jatyr.

Alǵashqy kúni kórer­mender pavlodarlyq akterler sahnalaǵan Shekspırdiń «III Rıchard» qoıylymyn tamashalady. Akterlerdiń ónerin Qazaqstannyń eń­bek sińirgen qaıratkeri, M.Áýezov atyndaǵy Qazaq ulttyq drama teatrynyń dırektory Erkin Jýasbek bastaǵan qazylar alqasy baǵalaıdy.

PAVLODAR