Elordanyń Ulttyq akademııalyq kitaphanasynda «KitapTime – 2024» jalpy respýblıkalyq kitap festıvali ótti. Oqýdy keńinen nasıhattaý, ıntellektýaldy jastardy yntalandyrýdy maqsat etken janazyq jármeńkesi memleketimizdiń kópshilik kitaphanalarynyń qoldaýymen elimizdiń ár óńirinde uıymdastyryldy. Aıta keteıik, ıgilikti joba Mádenıet jáne aqparat mınıstrliginiń yjdaǵatymen bıyl úshinshi ret ótkizilip tur.
Festıvaldyń resmı ashylýyna deıin kúndizgi ýaqytta kitap baspalary men dúkenderiniń kórme-jármeńkesi uıymdastyryldy. Sonymen qatar shet memleketter elshilikteriniń kitaptary da el nazaryna usynyldy.
Alǵashqy bolyp sóz alǵan Arhıv, qujattama jáne kitap isi komıtetiniń tóraǵasy Rýstam Álı elimizde kitap oqý mádenıetiniń artyp kele jatqanyn aıtyp, Parlament Senatynyń tóraǵasy M.Áshimbaev pen Mádenıet jáne aqparat mınıstriniń mindetin atqarýshy Q.Ysqaqovtyń quttyqtaý hatyn jetkizdi. «Memleket basshysy Qasym-Jomart Toqaev Ulttyq quryltaıda kitap oqý men kitap shyǵarýdyń el bolashaǵy úshin mańyzdylyǵyna toqtalyp, shyn máninde, kitap oqıtyn el zııaly ultqa aınalady dep atap ótkeni belgili. Osy oraıda úshinshi ret uıymdastyrylyp otyrǵan festıval kitap pen ony oqýdyń mártebesin kóterý, jas urpaqtyń ádebıetke degen qyzyǵýshylyǵyn arttyrýdy jáne aqparattyq mádenıetti qalyptastyrý, jazýshylar men oqyrmandar úshin qarym-qatynas alańyn qurýdy kózdeıdi», dedi ol.
Festıval aıasynda áýe ushaǵynyń bortynda jolaýshylarǵa ulttyq aýdıokontent usyný maqsatynda kitaphana men «Air Astana» avıakompanııasy arasynda yntymaqtastyq týraly memorandýmǵa qol qoıyldy. Bul joba jolaýshylardyń sapar barysynda qazaq aýyz ádebıetiniń baı murasymen sýsyndap, taǵylym alýyn kózdeıdi. Endi áýedegi árbir jolaýshy qazaqtyń dástúrli án-kúılerin, batyrlar jyryn, sonymen qatar qazaq ádebıetiniń jaýhar týyndylarynyń aýdıonusqalaryn ushaq bortyndaǵy medıa-qurylǵy arqyly tyńdap, oqı alady.
«Memleketimizdiń irgeli avıakompanııasy retinde qazaq halqynyń ádebıeti men mádenıetine basym baǵyt berý maqsatymyz. Ulttyq akademııalyq kitaphana arasyndaǵy selbestigimiz – sonyń jarqyn dáleli. Aldaǵy ýaqytta bul baılanysymyz bekı túsip, tyń jobalardy birge atqaramyz degen senimdemiz», dedi «Air Astana» borttyq qyzmet kórsetý jónindegi vıse-prezıdent Elena Obýhova.
Buǵan qosa rýhanııat merekesine kelgen jurtshylyq qolóner sheberleri men sýretshilerdiń «Art-álem», «Kóshpeliler ǵalamy» atty kórmesi men balalarǵa arnalǵan ınteraktıvti oıyn-saýyq is-sharalaryn tamashalady.
Osy kezde kitaphananyń ataýly zaldarynda ádebı shyǵarmalardyń tanystyrylymy, qalam qaıratkerleriniń sheberlik saǵaty, ıntellektýaldy oıyndar men trenıngter ótip jatty. Sondaı-aq oqyrman qaýym «Qalamger qoltańbasy» buryshynda qazaq avtorlarymen kezdesip, jańadan jaryq kórgen shyǵarmalaryn qoltańbasymen alý múmkindigine ıe boldy.
Festıvaldyń qorytyndy bólimindegi elordalyq aqyndardyń qatysýymen ótken «Sezimder sóılegende» ádebı-sazdy keshi poezııasúıer jurtshylyqtyń kóńilinen shyqty. Kesh barysynda Tanakóz Tolqynqyzy, Ularbek Nurǵalym, Maqpal Mysa syndy aqyndar óleń oqyp, ádebıet tóńireginde oı-pikirin ortaǵa saldy.
Kitaphana dırektory Ǵazıza Qudaıbergenniń aıtýynsha, elimizde kitap oqıtyn jastardyń sany kúnnen-kúnge artyp keledi. «Zamanaýı tilmen aıtsaq, kitap oqý trendke aınaldy», deıdi. Sonymen qatar kitaphana júıesi aldaǵy ýaqytta oqyrman talap-talǵamyna qaraı kemeldene beretinin jetkizdi.