Brazılııadaǵy ormandy alqaptardy qalpyna keltirý maqsatynda zamanaýı qurylǵylar qoldanylyp jatyr. Dálirek aıtsaq, adam basqaratyn drondar áýeden tuqym seýip shyǵady, dep habarlaıdy Egemen.kz.
Qyzyqty derekti «Egemen Qazaqstan» gazetiniń tilshisi Bekzat Qulshar «Ǵalam ǵajaptary: Orman qorǵaýshy jasandy ıntellekt» tanymdyq maqalasynda tilge tıek etti.
Brazılııalyq mamandardyń aıtýynsha, bul iste ushý aparattarynyń paıdasy zor. Ásirese adam qoly jete bermeıtin jerlerde áleýeti keń.
Máselen, arnaıy drondar nebári bir kúnde 50 gektar aýmaqqa tuqym seýip shyǵady. Bul adamnyń eńbek kúshinen áldeqaıda jyldam ári ónimdi ekenin dáleldeıdi. Brazılııa bıligi atalǵan tehnologııanyń arqasynda bir mıllıon túp aǵash egýdi kózdep otyr.
Mundaı zamanaýı ádister Qazaqstanda qoldanylady ma? Bul suraqqa da jaýap izdep kórdik.
Elimizde drondar egin sharýashylyǵynda paıdalanylady. Dese de, bul endi ǵana qalyptasyp jatqan úrdis. Odan bólek, Qazaqstanda dron shyǵarý salasynda da alǵashqy qadamdar jasalyp jatyr. Máselen, «Atameken» kásipkerler palatasy aýyl sharýashylyǵy, munaı-gaz, taý-ken jáne ónerkásiptiń basqa da salalary úshin Qytaımen birlesip dron shyǵaratyn kásiporyn qurý josparlanyp otyrǵanyn málimdegen edi.
Al Kansas State University júrgizgen zertteýlerge zer salsaq, drondardy qoldaný arqyly daqyldardyń «densaýlyǵyn» baqylaý, aramshópterdi anyqtaý jáne ónimdilikti arttyrýda shyǵyndardy 75 paıyzǵa deıin azaıtýǵa bolady.