Egis alqabyndaǵy eńbek maıdanynyń alǵy shebinde «AgromashHoldıng KZ» zaýytynan shyqqan kombaındar júr. Zaýyt bıyl aýyl sharýashylyǵy tehnıkalaryna qajet 250 myń qosalqy bólshek, myńǵa jýyq «Lovol» traktoryn, 300 «Essil», «Deutz-Fahr» kombaındaryn jasap shyǵardy.
«Tehnıka satyp alýǵa arnalǵan 6 paıyzdyq jeńildetilgen nesıe baǵdarlamasy aıasynda memleket qazynasynan 100 mlrd teńge qarjy bólingen soń, bizdiń ónimderge degen suranys ta kúrt ósti. Tamyz bastalǵaly demalyssyz jumys istep jatyrmyz. Atalǵan baǵdarlamanyń nátıjesinde tehnıkanyń kem degende 6 paıyzy jańarady», deıdi «Agromash» zaýytynyń prezıdenti Dınara Shúkijanova.
Kásiporyn byltyr 1 200-den asa otandyq traktor, kombaın shyǵarǵan. Ásirese «Lovol» traktoryna degen suranys joǵary boldy.
Máselen, 2023 jyly zaýyt 939 birlik «Lovol» traktoryn qurastyrsa, sonyń bári konveıerden shyǵa sala satylyp ketken. «Agromash» ótken jyldan bastap «Lovol» kombaındarynyń óndirisin de qolǵa alǵan. Onyń onshaqtysy sol jylǵy jıyn-terim naýqanyna qatysyp, qýatty ári tózimdi tehnıka ekenin dáleldep úlgerdi.
Búginde elimizdiń ár óńirinde «Agromashtyń» 9 fılıaly jumys istep tur. 2023 jyly jeltoqsanda Kókshetaýda zaýyttyń tehnıkalyq qyzmet kórsetý ortalyǵy ashyldy. Kásiporyn bul ortalyqtyń qurylysyna 250 myń teńge jumsaǵan.
«Agromash» aldaǵy jyldy «Qyzmet kórsetý jyly» dep belgilep qoıǵan. 2024 jyly kásiporyn «Lovol», «Essil», «Deutz-Fahr» kombaındarynyń anaǵurlym joǵary qýatqa ıe úlgilerin shyǵara bastady. Bıylǵy maýsymda kombaın, traktor óndirisiniń aýqymyn 35 paıyzǵa deıin ulǵaıtý kózdelip otyr. Taıaýda «Agromash» lokalızasııalyq ortalyǵy «ST Esemblı» zaýytymen seriktestik aıasynda «Claas» traktorlary men kombaındarynyń birqatar qosalqy bólshegin shyǵarýdy qolǵa aldy.
«Lokalızasııalyq ortalyq ekijaqty ónerkásiptik kooperasııa aıasynda «Claas» traktorlaryna arnalǵan aldyńǵy salmaq túsirgishter, «Cerio» jáne «Vario» oraqtaryna arnalǵan tirkeme arbalar, ózge de qosalqy bólshekter shyǵarady. О́tken jyldyń ózinde zaýyt qabyrǵasynda 250 myńnan astam komponent daıyndaldy», deıdi kásiporynnyń operasııalyq tıimdilik jónindegi dırektory Bahtııar Balǵojın.
Lokalızasııalyq ortalyqtyń aýmaǵy 36 myń sharshy metrden asady. Mundaǵy ámbebap sehtarda zamanaýı qurylǵylardyń tutqasyn ustaǵan 700 adam jumys isteıdi.
Qostanaı oblysy