Senat depýtattary Nurlan Beknazarov, Nurtóre Júsip jáne Aıgúl Qapbarova «Ońtústik» arnaıy ekonomıkalyq aımaǵynda bolyp, «ONTUSTIK» óńirlik telearnasynyń, Shymkent qalasyndaǵy №11 aýrýhananyń jáne «Bal Tekstıl» JShS ujymdarymen kezdesti, dep habarlaıdy Egemen.kz Senattyń baspasóz qyzmetine silteme jasap.
Kezdesýge qatysýshylar atom energetıkasyn damytýdyń keleshegin, onyń áleýetin jáne Qazaqstannyń energetıkalyq bolashaǵy men qaýipsizdigine qosqan eleýli úlesin talqylady.
Senatorlar atom energetıkasy ásirese, ónerkásipte jáne ekonomıkalyq ósip-órkendeý kezinde energııaǵa ósip kele jatqan suranysty qanaǵattandyrý boıynsha asa mańyzdy ekenin aıtty. Nurlan Beknazarov ekonomıkanyń turaqty damýy jáne resýrstyq ekonomıkadan joǵary tehnologııalyq ındýstrııaǵa kóshý úshin senimdi bazalyq energııa qajet ekenin jetkizdi.
«Qazirgi zamanǵy reaktorlardyń negizgi ereksheligi – syrtqy jáne ishki tótenshe jaǵdaılarda qondyrǵynyń turaqtylyǵyn joǵary deńgeıde qamtamasyz etetin belsendi jáne passıvti qaýipsizdik júıeleriniń úılesim tabatyny. Sonymen qatar radıoaktıvti qaldyqtarmen jumys jónindegi qoldanystaǵy zańnamada atom elektr stansalary men basqa da salalarda, onyń ishinde medısına, ónerkásip jáne ǵylymı zertteýlerde olardy qaýipsiz saqtaýǵa qoıylatyn talaptar naqty rettelgen», dedi Nurlan Beknazarov.
Nurtóre Júsip óz kezeginde aldaǵy jalpyhalyqtyq referendým memleket úshin ǵana emes, búkil Qazaqstan halqy úshin salmaǵy zor sheshim qabyldaýdyń sheshýshi sáti bolatynyn atap ótti.
«Aldaǵy referendýmnyń nátıjesi elimizdiń odan ári damýynyń kilti bolmaq. Atom elektr stansasyn salý – elektr energııasynyń turaqty kózimen qamtamasyz etýdiń joly ǵana emes, sonymen qatar sabaqtas salalardy: zamanaýı tehnologııany, qurylys, ǵylym men bilim berýdi damytýdyń qýatty katalızatory. Onyń elimizge energııa tapshylyǵy jaǵdaıyn jaqsartýǵa jáne energııaǵa táýeldilikti azaıtýǵa múmkindik beretinin túsiný mańyzdy. Atom elektr stansasynyń qurylysy osy joldaǵy mańyzdy qadamdardyń biri bolýy tıis», dedi Nurtóre Júsip.