Astanada Ulttyq mýzeıdiń 10 jyldyǵyna arnalǵan Qazaqstan mýzeı kongresi ótti. Jıynǵa 12 elden 100-den asa zertteýshi men mýzeı qyzmetkeri qatysty. Aýqymdy is-shara aıasynda Mádenıet jáne aqparat mınıstri Aıda Balaeva Lývr mýzeıiniń Islam óneri departamentiniń dırektory Sýraıa Nýdjaıymmen, Fransııanyń Qazaqstandaǵy Tótenshe jáne ókiletti elshisi Sılvan Gıogemen kezdesý ótkizdi.
Taraptar Qazaqstan men Fransııa arasyndaǵy mádenı baılanystardy nyǵaıtý, yntymaqtastyqty keńeıtý máselelerin talqylady. Mınıstr eki eldiń tarıhı-mádenı murasyn zertteý aıasynda Astana men Parıj arasyndaǵy ǵylymı-zertteý jumysyndaǵy áriptestikti odan ári nyǵaıtýdy usynyp, mýzeı isi salasyndaǵy birlesken zertteýlerdiń mańyzdylyǵyn atap ótti.
A.Balaeva fransýz áriptesterine tájirıbe almasýǵa jáne eki eldiń mýzeıleri arasyndaǵy yntymaqtastyqty nyǵaıtýǵa yqpal etetin sımpozıýmdar, kórmeler men ǵylymı konferensııalar, trenıngter men semınarlar uıymdastyrýdy usyndy.
«Búgingi kezdesýimiz óte mańyzdy. Bul bizdiń Gıme mýzeıi sııaqty Lývrmen de tyǵyz yntymaqtastyqta bolyp, jumys isteýimizge yqpal etedi dep oılaımyn. Mınıstr retinde men ǵylymı yntymaqtastyqqa múddelimin. Birlesken kúsh-jigerimiz jańa, buǵan deıin beımálim bolyp kelgen tarıhı derekter men jádigerlerdi ashýǵa múmkindik beretinine senimdimin. Basym baǵyt ǵylymı zertteýler bolýy kerek. Bul eki el úshin de úlken múmkindikter ashady. Qazaq mádenıeti halyqaralyq ǵylymı qaýymdastyqtyń nazaryna ilikken biregeı jádigerlerge baı. Degenmen áli ashylmaǵan qyrlary da jeterlik», degen mınıstr Lývr mamandaryn Qazaqstanǵa shaqyrdy.
О́z kezeginde S.Nýdjaıym eki el yntymaqtastyǵyn keńeıtýge múddelilik tanytyp, Lývrdyń mádenı murany restavrasııalaý jáne zertteý salasynda birlesken zertteýler júrgizýge múddeli bolatynyn atap ótti.
«Ǵylymı yntymaqtastyqty damytý biz úshin de óte qyzyqty. Bul baǵytta áriptestik ornatýǵa daıynbyz. Birlesken zertteýler Qazaqstannyń mádenıeti týraly bilimimizdi keńeıtip, eki tarap úshin de mańyzdy jańalyqtar ashýǵa múmkindik beredi», dedi Lývr murajaıynyń Islam óneri departamentiniń dırektory.
Kezdesýde Fransııanyń Qazaqstandaǵy Tótenshe jáne ókiletti elshisi S.Gıoge eki el úshin ǵylymı yntymaqtastyqtyń bolashaǵy zor sala ekenin atap ótti. Sondaı-aq Fransııa elshiliginiń osy jobalardy júzege asyrýǵa kómektesýge, ǵylym, mádenıet salalaryndaǵy áriptestikti damytýǵa daıyn ekenin aıtty.
Sondaı-aq jıyn barysynda Qazaqstan men Fransııa arasyndaǵy mádenı jáne ǵylymı baılanystardy nyǵaıtýǵa negiz bolatyn yntymaqtastyq jónindegi baǵdarlama men qujatty túbegeıli ázirleý týraly sheshim qabyldandy.