Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýynda elimizdiń qarjy júıesin damytý boıynsha birqatar tapsyrma men mindet júktedi.
Aıtalyq, Prezıdent jańa Salyq kodeksiniń sapaly ázirlenýi úshin onyń qabyldaý merzimin kelesi jylǵa deıin uzartty. Álbette, bul máselede qoǵamnyń, onyń ishinde isker ortanyń tilegi men bıýdjettiń erekshelikteri eskerilip, salmaqty ári baıypty sheshim qabyldanýy qajet.
Jasyratyny joq, osy zańdy daıyndaý barysynda salyq rejimderi týraly kóp suraq týyndady. Qazir arnaıy salyq rejimi aıasynda 2 mln-ǵa jýyq kásipker jumys istep jatyr. Ońtaılandyrylǵan deklarasııany 1 mln 900 myńdaı adam tańdaǵan. Al bólshek salyq júıesi arqyly 30 myńdaı adam óz kásibin ilgeriletip keledi. Árıne, bul rejimderdiń paıdasy bar. Biraq osy arqyly salyq tóleýden jaltaryp júrgender de kezdesedi. Mysaly, keıbir iri kompanııalar ózderiniń mańaıyna júzdegen jeke kásipkerdi shoǵyrlandyryp, osylaısha, shyǵystaryn arttyrýmen birge salyq mindettemesin azaıtýdyń amalyn qarastyryp júr.
Memleket basshysynyń Joldaýynda aıtylǵandaı, arnaıy salyq rejimderi jeke tulǵalarǵa arnalyp, baǵyttalýǵa tıis. Sol sebepti atalǵan zańdy qaıta qarastyryp, pysyqtaımyz. Bizdiń maqsatymyz – salyq túsimderin ulǵaıtý, sol arqyly ekonomıkalyq ósimge jol ashý.
Buǵan qosa Joldaýda qaryzdary bar kásipkerlerdiń shottaryn birden buǵattamaý jóninde de aıtyldy. Ras, qazir qaryz mólsheri 6 AEK-ten asatyn bolsa, onda esepshot buǵattalady. Prezıdenttiń tapsyrmasyna sáıkes bul talap, shekti qoıý mólsheri qaıta qaralady. Aıtalyq, bereshek deńgeıi 20-25 AEK-ten asyp jatsa da, biz onyń shotyn buǵattamaı, tek qana habarlama jiberý arqyly baqylaý júrgizý tetigin engizýdi kózdep otyrmyz. Áıtse de jiberilgen habarlamalar men tıisti eskertýler elenbeı, qaryz mólsheri ulǵaıa berse, sonda ǵana naqty sharalar qabyldanady. Tutastaı alǵanda, baqylaý júıesinen birte-birte arylyp, servıstik qyzmetterge basymdyq berýdi josparlap otyrmyz.
Erjan BIRJANOV,
Qarjy vıse-mınıstri