Qoǵamda kitap oqýdy nasıhattaý, oqyrman jastar qataryn kóbeıtý maqsatynda «Amanat» partııasy men Qazaqstan baspagerler, polıgrafıster jáne kitap taratýshylar qaýymdastyǵy birlesip, respýblıka kóleminde «Kitap-Amanat» kitap saýda jelisin damytyp jatyr. Elimizdiń birqatar oblysy men iri qalasynda «Amanat» partııasynyń keńselik ǵımarattary janynan ashylǵan «Kitap-Amanat» dúkenderindegi ártúrli mazundaǵy ádebıetter, ǵylymı-tanymdyq basylymdar kitapsúıer qaýym úshin qoljetimdi.
Jaqynda halyqaralyq yntymaqtastyq pen rýhanı mádenıetti damytýǵa baǵyttalǵan Eýrazııalyq kitap dúkender jelisi arasynda ótkizilip turatyn dástúrli baıqaýda «Kitap-Amanat» jobasy jeńimpaz atanyp, TMD elderi atqarý komıtetiniń qurmet gramotasyna ıe boldy. Uıymdastyrýshylar bul jobanyń naýqandyq is-shara emes, rýhanııatqa, ádebıetke, ulttyq ıdeologııaǵa tikeleı qyzmet etetin jáne qazaq tilindegi kontent aıasyn keńeıtýge baǵyttalǵan aýqymdy joba ekenin aıtady.
«Halqymyzdyń ádebı murasyn keńinen nasıhattap, jastardyń bilimge, kitapqa degen qyzyǵýshylyǵyn arttyrý, ulttyq rýhanııatty jańǵyrtý maqsatynda qolǵa alynǵan «Kitap-Amanat» jobasy kitap satatyn oryndar sanyn arttyrýǵa ǵana emes, mádenıet pen bilimniń oshaǵy, ıntellektýaldyq ortalyqtardyń kóbeıýine yqpal eteri sózsiz. Qoǵam damyǵan saıyn, jańa tehnologııalar men elektrondy resýrstar kúndelikti ómirdiń ajyramas bóligine aınalyp otyr. Osy oraıda kitap dúkenderin nasıhattaýda, damytýda jańa zaman tehnologııalaryn da tıimdi paıdalana otyryp, «Kitap-Amanat» jobasy arqyly kitap taratý jelisin damytpaqshymyz» deıdi Qazaqstan baspagerler, polıgrafıster jáne kitap taratýshylar assosasııasynyń prezıdenti Ádil Qoıtanov.
Kitap oqý tanymǵa, izdeniske degen qulshynysty oıatýymen erekshelense kerek-ti. Uıymdastyrýshylar «Kitap-Amanat» saýda núktesi ǵana emes, kitapsúıerler klýbyna aınaldyrýdy kózdeıdi. Joba aıasynda ulttyq hám álemdik ádebıetke degen qyzyǵýshylyqty arttyryp, qoǵamdy kitap oqýǵa yntalandyrý, otandyq avtorlardy qoldaı otyryp, aımaqtaǵy aqyn-jazýshylarmen túrli formattaǵy kezdesýler, jańa kitaptardyń tusaýkeserin ótkizý qolǵa alynǵan.
Sońǵy jyldary elimizde gazet-jýrnal, kitap satatyn dúńgirshekterdiń turaqty jumys istemeýi, tipti jabylyp qalýy da oqyrmandardy alańdatady. Osyǵan oraı qazaq tilindegi gazet-jýrnaldardy da osy dúkender jelisi arqyly satylymǵa shyǵarý kózdelip otyr.
Búginde «Kitap-Amanat» kitap dúkenderi áleýmettik jelide de keńinen nasıhattalyp jatyr. Arnaıy saıty, instagram jáne facebook platformalarynda paraqshasy bar. Oqyrmandar osy platformalar arqyly kelip túsken jańa kitaptar, ártúrli baıqaýlar, jeńildikter, kezdesýler men konferensııalar, taǵy da basqa is-sharalar týraly habardar bolyp otyrady.
ALMATY