Atyraýda «Sarayshyq upgrade – 2024» halyqaralyq jastar forýmy ekinshi ret ótti. Oǵan qatysýǵa myńnan asa jas nıet bildirgen. Forýmǵa irikteýden ótken 300-den asa jas qatysty. Olar Reseı, Qyrǵyzstan, О́zbekstan, Ázerbaıjan memleketinen, elimizdiń barlyq qalasynan kelgen.
Atyraý oblysynyń ákimi Serik Shápkenovtiń pikirinshe, mundaı forýmdy jyl saıyn ótkizý qajet. О́ıtkeni bul jańashyl jastardyń jetistikke jetýine yqpal etedi. Eki kúndik forýmda jasandy ıntellekt, marketıng, mýzyka jáne kınematografııa, teatr, horeografııa baǵytyndaǵy jańalyqtar men túıtkilder talqyǵa tústi. Demek, bul – jastarǵa ózara pikir almasatyn, tájirıbe bólisetin alań.
Máselen, byltyrǵy forýmǵa «Mýzyka» baǵyty boıynsha qatysqandardyń qatarynda atyraýlyq «KEZEN» toby bar. Bul top Astanada ótken «YouFest» festıvaline shaqyrylyp, alǵash ret estrada juldyzdarymen birge óner kórsetti. Al H.Dosmuhamedov atyndaǵy Atyraý ýnıversıtetiniń stýdenti Orynbasar Narıman «Kınematografııa» baǵytynda tájirıbe jınaǵan. Ol otandyq fılmderge qozǵalyp turatyn afısha usynǵan edi. Onyń bul jobasy elimizdiń ár óńirinde kórsetildi.
«Qazir álemde kún saıyn derlik ózgeris bolyp jatyr. Zamanaýı máseleler de týyndaıdy. Osyndaı sátte jigerli ári shyǵarmashyl jastardyń orny da, úni de erekshe mańyzǵa ıe bolady. Jas býynnyń oı-pikiri men usynystary bizdiń óńirdiń ǵana emes, elimizdiń damýyna jańa serpin beredi. Sol sebepten osy forým aıasynda almasqan tájirıbeler men ıdeıalar jarqyn jobalarǵa jol ashady dep úmittenemin. Birlesken jumystardyń nátıjesinde, qoǵamnyń demokratııalyq úrdispen damýyna, ekonomıka men rýhanııattyń alǵa basýyna bastaıtyn mańyzdy jobalar iske asyrylatynyna senemin», dedi S.Shápkenov.
Mádenıet jáne aqparat mınıstrligi Jastar jáne otbasy isteri komıtetiniń tóraǵasy Qaırat Qambarovtyń pikirine súıensek, óńirlerde kadr tapshylyǵy bar. Sol sebepten jastar eńbek jolyn óńirde bastaǵany jón.
«Bul jastarǵa jergilikti turǵyndardyń tynys-tirshiligimen, túıtkildi máselelerdi sheshý jolymen jete tanysýy úshin qajet. О́ńirdegi turǵyndardyń turmysyn kórip, tájirıbe jınaqtaı alady. Sondyqtan jastardyń nazaryn osy máselege aýdarǵym keledi. Elimizdegi ózekti máseleniń biri – jastardy jumyspen qamtý. Olardy jumysqa ornalastyrýǵa baılanysty birneshe baǵdarlama iske asyrylyp jatyr», dedi Q.Qambarov.
Forýmnyń alǵashqy kúninde Damır Tólenov «Marketıng» baǵytynda dáris ótkizdi. Otandyq kásipker sıfrlyq marketolog retinde tanymal. Ol bes aıda «TikTok»-ta 160 myń, Instagram-da 90 myń izbasar jınap, elimizdegi eń qymbat prodıýserlik kompanııanyń negizin qalaǵan. Sondaı-aq ótken jyly 150 myńnan asa jazylýshy jınap, 300 mln teńge tabys taýypty. Al shákirtteriniń jeke brendıng arqyly tapqan tabysy 900 mln teńgeden asqan. Onyń jumysy men tálimgerligi kóp jastyń tabysqa jetýine, qarjylyq saýatyn jetildirýine jol ashqan.
Ol marketıng baǵytyndaǵy sheberlik saǵatynyń alǵashqy kúni chellendj jarııalady. Sóıtip, qatysýshylar arasynan shyqqan eriktige sabaq sońyna deıin 150 myń teńge aqsha tabýdy usyndy. Onyń dárisin tyńdaǵandardyń biri Sulýbıke Karımova tálimgerlikke bet burǵan. Jeke kásibi de bar.
«Sulýbıke Karımova meniń keńesterimdi paıdalanyp, berilgen tapsyrma boıynsha áreket etti. Jeke kýrsyn satý arqyly 1 mln 75 myń teńge kóleminde tabysqa keneldi. Demek meniń dárisimniń jastarǵa paıdasy tıip tur», deıdi D.Tólenov.
Al Nursultan Qaldybaı Aqtóbe qalasynda turady. Forýmǵa qatysýǵa arnaıy kelipti. Ol da marketıngtiń qyr-syryna qanyǵyp, tájirıbesin jetildirý maqsatynda chellendjge qatysty. О́ziniń avtorlyq saǵatyn satyp, 185 myń teńge tabys tapty.
Atyraý oblysy