Búginde álemge áıgili Lıonel Messı, Krıshtıaný Ronaldý, Kılıan Mbappe syndy teńbil dop sheberlerimen qatar, ózimizdiń Baqtıer Zaınýtdınov, Baýyrjan Islamhan, Aıbol Ábiken, Ashat Taǵybergendeı ulttyq quramanyń kil myqtylaryn maqtanysh sanaıtyn, úlgi tutatyn jasóspirimder kóp. Ásirese aýyl-aımaqtaǵy balalardyń bul oraıdaǵy armany asqaq. Osyny qaperge alǵan «AýylFýtbol» jobasy júzdegen balanyń jasyl alańda teńbil dop teýip, shyńdalýyna birden-bir bastamashy bolyp keledi.
Jaqynda Almaty qalasyndaǵy «Aport Mall East» ortalyǵynda erekshe shara ótti. Jobanyń bas demeýshisi «Halyq» qaıyrymdylyq qory jasóspirimderdiń qabiletin, olardyń jattyqtyrýshylarynyń eńbegin baǵalap, úzdikterdi ata-analarymen birge marapattady.
«2018 jyly «AýylFýtbol» jobasyna enip, sodan beri balalardy fýtbol oınaýǵa baýlyp, sheberlikterin shyńdap kelemiz. Byltyr «Úzdik jattyqtyrýshy» atandym. Sondaı-aq shákirtim, 13 jasar Maǵjan Bazarbaı «Úzdik shabýylshy» atanyp, mereıi ósip otyr. Úıirmede 40-qa jýyq bala aptasyna úsh ret fýtbol alańyna shyǵyp, jattyǵady. Demalys kúnderi joldastyq kezdesýlerge, Almaty qalasynda ótetin jasóspirimder fýtbol lıgasynyń oıyndaryna qatysyp, tóselip keledi. Nátıje jaman emes. «AýylFýtbol» jobasynyń jetekshisi Serik Mámbetov pen «Halyq» qaıyrymdylyq qory qamqorlyǵynyń arqasynda fýtbol úıirmesine qatysýshy jasóspirimder tegin sporttyq kıimmen, doppen qamtylyp, sondaı-aq jarystarǵa tegin qatysýǵa múmkindik alyp, qordyń qamqorlyǵyn aıqyn sezinip keledi», deıdi Eńbekshiqazaq aýdany Almaly aýylyndaǵy balalar men jasóspirimder fýtbol úıirmesiniń jetekshisi Dıdar Shyrǵanaqov.
«Byltyr «Halyq» qaıyrymdylyq qorymen memorandýmǵa qol qoıǵan edik. Sonyń negizinde Almaty oblysynan fýtboldan úzdik balalardyń basyn biriktirip, qurama komanda quryldy. Búgingi kúni 2011, 2013, 2014 jylǵy balalardan quralǵan 3 komanda jasaqtaldy. Onyń árbirinde 12-13 baladan bar. Sóıtip, 40-qa jýyq bala jınalyp, 3 komanda jazda Almaty qalasynda fýtboldan ótken jasóspirimder arasyndaǵy chempıonatqa qatysty. Nátıjesinde, 2013 jylǵy fýtbolshylarymyz chempıon atandy. 2014 jylǵy balalar 3-oryndy ıemdense, 2011 jylǵy balalar da myqty oıyn úlgisin kórsetip, 2-orynǵa turaqtady. Qurama komandaǵa qatysýshy balalar – Almaty mańaıyndaǵy Eńbekshiqazaq, Qarasaı, Ile, Talǵar, Jambyl aýdandaryndaǵy «AýylFýtbol» jobasyna qatysatyn komandalardan iriktelip alynǵandar», deıdi atalǵan jobanyń jetekshisi, belgili jýrnalıst Serik Mámbetov.
«AýylFýtbol» jobasyna qatysýshy komandalarǵa «Halyq» qaıyrymdylyq qory memorandým aıasynda qamqorlyq jasap kele jatqandyǵyn aıryqsha ataý kerek. Aıtalyq, fýtbol dese ishken asyn jerge qoıatyn jasóspirimder men jattyqtyrýshylardy arnaıy sporttyq kıim, doppen qamtamasyz etip qana qoımaı, qysta, kóktemde Qarǵaly aýylyndaǵy lagerge ornalastyryp, bir apta boıy alańsyz jattyǵýlaryna ári demalystaryn tıimdi, kóńildi ótkizýlerine tolyq jaǵdaı jasap bergen. Bul dástúr bıylǵy jazda da jalǵasyn taýyp, oblystyq jasóspirimder qurama komandasy Qapshaǵaı kóliniń jaǵasynda demaldy. Komanda quramyndaǵy balalardyń tamaqtanýy, jol júrýi, jatyn orny, basqa da kerek-jaraq shyǵyndaryn tolyq «Halyq» qaıyrymdylyq qory kóterdi.
Qonaev qalasy, Qarǵaly aýylynda ótken oqý-jattyǵý jıyndaryn elimizdiń jastar quramasynyń burynǵy oıynshysy, sport sheberi Azat Bıtabarov júrgizdi. Oǵan ÝEFA D sanatyndaǵy jattyqtyrýshylar Serjan Qaptaǵaev, Dıdar Sherǵanaqov, Ámir Bolatov atsalysty. Nátıjesinde, bul tórtkúl dúnıe kóz tigetin fýtbolǵa Almaty oblysyndaǵy jasóspirimderdiń qyzyǵýshylyǵyn arttyrýǵa septigin tıgizip otyr. Osy oraıda, «AýylFýtbol» jobasy aıasynda elimizdiń barlyq oblystarynda irikteý jarystary jalǵasyp jatyr. Jyl sońynda jeńimpaz komandalar arasynda Almaty qalasynda ótetin respýblıkalyq jarysqa oblystyq qurama da qatysady.
«Halyq» qaıyrymdylyq qory – elimizdiń bilim, sport, mádenıet, áleýmettik salalaryn qoldaý jobalaryn qarjylandyrady. Qor jumys istegen 8 jyldyń ishinde 85 mlrd teńgeden astam qarjy aýdarǵan.
Dodaly jarysta úzdik oıyn kórsetip, jeńimpaz bolǵan komandalar men olardyń jattyqtyrýshylaryn, fýtbolsúıer balalardyń ata-analaryn saltanatty is-sharada «Halyq» qaıyrymdylyq qorynyń Almaty oblystyq fılıalynyń dırektory Ǵalymbek Jaqsylyqov quttyqtady.
«Fýtbol oıyny – balany tózimdilikke, eptilikke, eńbekke baýlıdy, boıynda jaqsy daǵdylar qalyptastyrady. «AýylFýtbol» jobasynyń byltyrǵy maýsym aıynda ótken birinshiligine 24 komanda qatysty. Qazirde olardyń sany 111 komandaǵa jetip otyr. Elimizde 4 myńǵa jýyq bala, sonyń ishinde aýyl balalary ózderiniń «jasyl alań sheberi atansam» degen armandaryn júzege asyra alady. Qor mamandarynyń taldaý nátıjeleri aýyldyq jerlerde balalardyń sportpen aınalysýyna qoljetimsizdigin anyqtap otyr. Osy kemshilikti joıyp, aýyl balalarynyń sportpen júıeli shuǵyldanyp, jetistikke jetýine, tulǵalyq damýyna úlken múmkindik bolady degen senimmen bıyldan bastap qordyń qamqorlyǵymen «AýylSport» atty jańa jobamyz júzege asady. Joba sheńberinde sporttyń 6 túri, atap aıtsaq, shahmat, voleıbol, kúres, boks, karate túrlerinen óńirlik lıga bastalady», dep málimdedi Ǵ.Jaqsylyqov.
Saltanatty is-shara barysynda «AýylFýtbol» jobasyna enýge búginde 60 komanda nıet bildirip otyrǵany atap ótildi. Talap údesinen shyǵyp, jobaǵa ener bolsa, jyl aıaǵyna deıin elimizde atalǵan jobaǵa qatysýshy komandalar sany 171-ge jetedi dep kútilip otyr.
О́tken jyly «Halyq» qaıyrymdylyq qory men «AýylFýtbol» jobasy arasyndaǵy yntymaqtastyq sheńberinde qor aýyldyń 100 jastar men jasóspirimder komandasyn qajet qural-jabdyqpen qamtýdy, 100 jattyqtyrýshynyń ÝEFA-nyń D sanatymen biliktiligin arttyrýdy, 14 oblysta týrnır uıymdastyryp, qorytyndy respýblıkalyq týrnırdi Almaty oblysynda ótkizýdi, 3 komandany kásibı oqý-jattyǵý jıynymen qamtýdy, ıaǵnı osy sharalardy túgeldeı derlik qarjylandyrýdy óz moınyna alǵan edi. Joǵaryda atalǵan jumys – sonyń jarqyn dáleli.
Almaty oblysy