Qaraǵandyda densaýlyǵynda kináraty bar 83 jastaǵy zeınetker joǵalyp ketken, dep habarlaıdy Egemen.kz IIM baspasóz qyzmetine silteme jasap.
24 qyrkúıekte saǵat 12:30 shamasynda Qaraǵandy qalasy polısııa basqarmasynyń Ońtústik-Shyǵys polısııa bólimine qala turǵyny habarlasyp, 30 mınýt buryn 83 jastaǵy ájesi joǵalyp ketkenin habarlaǵan. Zeınetker páterden shyǵyp ketken.
Qart adam demensııamen aýyratyny belgili boldy. Oqıǵa týraly polısııa bóliminiń barlyq jeke quramyna, patrýldik narıadtarǵa habarlandy. Joǵalǵan zeınetkerdi izdeýge kınologııalyq qyzmettiń qyzmetkerleri qatysty. Kóp uzamaı polıseıler jaıaý júrginshiler jolynda jatqan zeınetkerdi tapty. Qyzmetkerler oǵan alǵashqy kómek kórsetip, keıin týystaryn shaqyrǵan.
«Ájemdi tez taýyp alǵan patrýldik polısııa qyzmetkerleri men kınologııalyq qyzmetke alǵysymdy bildirgim keledi», dedi joǵalǵan adamnyń týysy.