О́tken aptada Shymkent qalalyq opera jáne balet teatrynyń sahnasynda «Astana operanyń» kópten kútken gastroldik keshi ótti. Elordalyq trýppa el kompozıtorlarynyń týyndylarymen qatar, álemdik opera jaýharlaryna toly baǵdarlamasyn usyndy. Aıta keteıik, óner ujymynyń gastroldik sapary Mádenıet jáne aqparat mınıstrliginiń qoldaýymen ótip otyr.
Shyraıly Shymkent sahnasynda bekzat ónerdiń bólek bolmysyn kórsetken «Astana opera» ártisterin jergilikti teatrsúıer qaýym erekshe yqylaspen qarsy aldy. Quramynda sahna sheberleri, Qazaqstannyń eńbek sińirgen qaıratkerleri Jupar Ǵabdýllına, Janat Shybyqbaev, Meıir Baınesh, Bıbigúl Januzaq, Baǵdat Ábilhanov, Raýshan Beskembırova, halyqaralyq baıqaýlardyń laýreattary Gúldana Aldadosova, Talǵat Ǵaleev, Bolat Esimhanov, Talǵat Allabırınov bar elordalyq ujym halyqtyń qoshemetine tánti bolyp, shabyttana óner kórsetti.
Ásirese óner keshin el kompozıtorlary týyndylarynyń sheber oryndalýy kóriktendire tústi. E.Brýsılovskııdiń «Qyz Jibek» operasynan Shegeniń arııasy men M.Tólebaevtyń «Birjan-Sara» operasynan aıtys sahnasy syndy umytylmas sátter tyńdarmandarǵa úlken áser qaldyrdy. Bul shyǵarmalar, bir jaǵynan ulttyq mýzykalyq mádenıetti kórsetse, olardy naqyshyna keltire oryndaý – túp-tamyrymyzǵa oralýdy bildiredi.
El kompozıtorlarynyń mýzykasy A.Vıvaldı, P.Chaıkovskıı, A.Dvorjak, Dj.Pýchchını syndy álemdik klassıkterdiń arııalarymen úndesip otyrdy. Shabytqa toly óner saltanaty Qazaqstannyń eńbek sińirgen qaıratkeri Abzal Muhıtdınniń jetekshiligindegi «Astana opera» sımfonııalyq orkestri men horynyń súıemeldeýimen ótti.
Baǵdarlama sońynda shyrqalǵan Eskendir Hasanǵalıevtiń «Atameken» áni ártister men kórermenderdi otansúıgishtik sezim atmosferasynda biriktirdi. О́z eli úshin maqtanysh pen birliktiń rámizi retinde kópshilik bul kompozısııany tik turyp qosyla oryndady.
«Búgingi kesh shynymen de tańǵalarlyqtaı ótti. Osynaý biregeı mádenı tájirıbeni eshqashan umytpaımyn. Biz M.Áýezov atyndaǵy Ońtústik Qazaqstan ýnıversıtetindegi áriptesterimizben kezdesýge Qazaqstanǵa endi ǵana kelgen edik, sóıtip olar bizge operaǵa barýǵa usynys aıtty. Men mundaı daryndy ártisterdi bir sahnada buryn-sońdy kórmedim jáne kórermenderdiń osynshalyqty ystyq yqylasyna kýá bolǵan emespin. Baǵdarlamany aıaqtaǵan nómir erekshe este qaldy, osynaý úzdik nómirge zal dý qol shapalaq jaýdyrdy. Bul olardyń darynynyń kúshi men ónerdiń adamdardy biriktiretininiń naǵyz dáleli boldy», dedi AQSh-tan kelgen professor Krıstofer Djonston.
Sondaı-aq gastroldik baǵdarlamada jas tyńdarmandarǵa da erekshe kóńil bólindi. Olarǵa arnap «Mýzyka álemi» tanymdyq konserti ázirlenip, ártister oqýshylardy opera daýystarymen, aspaptarmen tanystyrdy. «Astana operanyń» mýzykatanýshysy Sáýle Máýletovanyń qyzyqty áńgimesinen kishkentaı teatrsúıer qaýym opera men klassıkalyq mýzyka álemi týraly kóbirek aqparat aldy.
«Astana opera» teatry qalamyzǵa gastrolmen keletinin afıshadan kórgende, birden balalarǵa arnalǵan konsertke de, keshki konsertke de bılet aldym. Bul – kúnde bola bermeıtin mańyzdy oqıǵa. Balalarym mýzyka mektebine baryp júrse de, negizgi bazany bilse de, búgin mýzyka álemine boılap, onymen jańasha tanysqandaı kórindi. О́ıtkeni sonyń barlyǵyn kózbe-kóz tamashalaý – múldem basqa tájirıbe. Balanyń bilim alýy bir bólek te, onyń jandy ónerdi tamashalaýy – bir bólek», deıdi kórermen Áıgerim Qojanova.
«Astana operanyń» Shymkenttegi shyǵarmashylyq sapary tabyspen ótip, naǵyz mádenı oqıǵaǵa aınaldy. Ártister ózderiniń kelýin asyǵa kútetin shymkenttik kórermenderdiń súıispenshiligi men rızashylyǵyn arqalap jolǵa shyqty. Mundaı mýzykalyq kósh respýblıkanyń túkpir-túkpirindegi el turǵyndaryn asqaq ónerge baýlyp, shekarasyn keńeıtetini sózsiz.