Buǵan deıin Shyǵys Qazaqstan, Pavlodar, Aqmola oblystary men Astana qalasyna jylý berile bastaǵan. 1 qazannan bastap Abaı, Aqtóbe jáne Qaraǵandy oblystarynda jylytý maýsymy bastaldy, dep habarlaıdy Egemen.kz.
Energetıka mınıstrliginiń málimetinshe, Qazaqstannyń Biryńǵaı elektr energetıkalyq júıesi Reseı Federasııasynyń jáne Ortalyq Azııa elderiniń energetıkalyq júıelerimen qatarlas jumysyn jalǵastyra otyryp, qalypty rejımde jumys isteıdi. 2024 jylǵa bekitilgen jóndeý kestesi aıasynda 10 energoblokta, 55 qazandyqta jáne 45 týrbınada kúrdeli jumystar josparlanǵan.
Qazirgi tańda 4 energoblokta, 22 qazandyqta jáne 16 týrbınada jóndeý jumystary júrgizilse, 5 energobloktyń, 32 qazandyqtyń jáne 28 týrbınanyń jóndeý jumystary aıaqtalǵan.
«Barlyq elektr stansııalary jylytý maýsymynyń bastalýyna daıyn, negizgi jabdyqtarmen, sonyń ishinde qazandyqtarmen jáne týrbınalarmen qamtamasyz etilgen. 2024 jyly AEK-tiń (elektr jelilerin taratý kompanııalarynyń) elektr jelilerinde 20,8 myń km elektr berý jelilerin, 422 qosalqy stansııany jáne 4054 taratý pýnktteri men transformatorlyq qosalqy stansııalardy jóndeý kózdelgen. Qazirdiń ózinde 19,9 myń km elektr jelileri, 376 qosalqy stansııa jáne 4046 taratý pýnkti men transformatorlyq qosalqy stansııalar jóndeldi», delingen habarlamada.
Aıta keteıik, jylýmen qamtý salasynda 2024 jyly 546 km jylý jelilerin kúrdeli jóndeý jáne jańǵyrtý josparlanǵan. Qazirgi ýaqytta 516,3 km jylý jelileri jóndelgen, bul jyldyq jospardyń 94,6% quraıdy.
2024 jylǵy 11 qyrkúıekte kezekti keńes ótkizilgen, onyń qorytyndysy boıynsha jóndeý jumystaryn ýaqytyly aıaqtaý, otynnyń normatıvtik qoryn saqtaý jáne energetıkalyq jabdyqtardy paıdalanýdy baqylaýdy kúsheıtý jóninde tapsyrmalar berilgen edi.
Sonymen qatar aldaǵy jylytý maýsymyna daıyndyq barysy 2024 jylǵy 20 tamyzdaǵy Úkimet otyrysynda talqylandy. Barlyq máseleler boıynsha tıisti sheshimder qabyldanǵan.