2-6 qazan kúnderi Tájikstannyń astanasy – Dýshanbede dzıýdodan jasóspirimder arasyndaǵy álem birinshiliginiń jalaýy jelbireıdi. Bul jarysta 67 memleketten kelgen 574 balýan baq synaıdy. Solardyń qatarynda elimizdiń 18 jas óreni bar.
Pamır taýynyń eteginde ótetin dodada elimizdiń jastar quramasynyń aǵa jattyqtyrýshysy Ermek Imanbekov myna shákirtterine senim artty: Uldar – Talǵat Orynbasar, Aldııar Qarǵulov (60 kg), Aqyljan Jubatqanov, Maǵjan Áljanov (66 kg), Ádilet Almat (73 kg), Azat Kúmisbaı (81 kg), Dosbol Balǵabaı (81 kg), Asqar Birjanov (90 kg), Jantilek Nurtilepuly (+100 kg), Sherhan Alpanov (+100 kg, komandalyq saıysta). Qyzdar – Sabına Iýldashbekova, Tásnım Ábdýálı (48 kg), Aıaýlym Qaırat, Arýjan Erejepova (52 kg), Dana Ábdirova (57 kg), Kórkem Orymbek (63 kg), Ajar Ashat (70 kg), Dıana Telbaeva (78 kg), Rýslana Maqatova (+78 kg). Qyzdardyń 78 kg, uldardyń 100 kg salmaq dárejelerinde balýandarymyz qatyspaıdy. Sebebi bul salmaqtardaǵy sportshylarymyz osal. Sol sebepti de bapkerler baıraqty básekege eshkimdi qospaýdy qup kórdi.
– Qazirgi kezde dzıýdo kúresi álemniń kóptegen memleketinde qarqyndy damyp jatyr. Alpaýyttardy aıtpaǵanda, irgemizdegi О́zbekstan, Tájikstan, Qyrǵyzstan balýandaryn utýdyń ózi ońaı sharýa emes. Sol sebepti komanda sapyna kil kúshtilerdi iriktep alyp, daıyndyq jumysyn tyńǵylyqty júrgizdik. Álem birinshiligine daıarlyq jumysy úsh kezeńdi qurady. Alǵashynda Qyrǵyzstannyń Ystyqkól óńirinde jınaldyq. Odan keıin Túrkistan oblysyndaǵy «Alma-taý» bazasynda shynyqtyq. Al sońǵy daıyndyǵymyzdy Almatyda pysyqtadyq. Endi Dýshanbedegi dodada jasóspirimder jasyndaı jarqyldap, jeńis tuǵyryna kóterilý úshin esh aıanyp qalmaıdy, – deıdi Ermek Imanbekov.