Pavlodar oblysynda turǵyn úılerdi jylýǵa qosý jumystary támamdalyp qaldy. Qazirde Aqsý qalasyndaǵy barlyq turǵyn úı jylýǵa qosylǵan. Al Pavlodar men Ekibastuzdaǵy is-sharalar bir-eki kúnde aıaqtalýy tıis.
Úsh qaladaǵy áleýmettik nysandardyń barlyǵy búginde jylýmen tolyq qamtylǵan. Aqsý qalalar arasynda eń alǵashqy bolyp barlyq áleýmettik mekemelerdi jáne úılerdi jylýǵa qosty. Al Pavlodar qalasyndaǵy 1 300 kóppáterli úıdiń tek 21-ine ǵana jylý kirmegen.
«Bul úılerdiń syrtqy jáne ishki jelilerinde apattyq jaǵdaılar anyqtalǵany sebepti jylý kesh berilip jatyr. Jóndeý jumystary júrgizilip, jylýmen qamtý mekemesiniń qyzmetkerleri gıdravlıkalyq jáne temperatýralyq rejimdi rettep jatyr. Negizi jylý berýdi 9 qyrkúıekte bastadyq. Bastapqy bette áleýmettik nysandar qamtyldy», dep habarlady Pavlodar qalasy ákiminiń baspasóz qyzmeti.
Pavlodar qalasynyń ákimi Hasar Habylbekov jylý parametrleri birden qalypty bolmaıtynyn eskertip otyr.
«Turǵyndar páterlerindegi batareıalar birden qyzbaıdy. Jylý jelilerin toltyrý birshama ýaqyt alady. Jelidegi sý aınalymy 22 myń tonnany quraıdy. Al jylý elektr ortalyǵyndaǵy jelilik sýmen toltyrýdyń eń joǵary múmkindigi – táýligine 800 tonna kóleminde. Osyǵan baılanysty qalany jylýmen qamtýdy tolyq iske qosý jáne baptaý úshin bizge birshama ýaqyt qajet», dedi shahar basshysy.
Ekibastuz qalalyq turǵyn úı ınspeksııasy bóliminiń basshysy Álibek Baıdildın shaharda 300-den astam kópqabatty turǵyn úı jylýǵa qosylyp úlgergenin málimdedi. Qalada jalpy sany 700 turǵyn úı jáne 6 myńnan astam jer úıler ornalasqan. Mundaǵy jylýǵa qosý jumystary aldaǵy eki kúnde tolyq aıaqtalady dep josparlanyp otyr.
Aqsý qalalyq ishki saıasat bóliminiń basshysy Ásemgúl Rakımova 16 qyrkúıekten bastap áleýmettik nysandarǵa, 23 qyrkúıekten turǵyn úılerge jylý jiberilgenin aıtady. Metallýrgter shaharynda 265 turǵyn úı men 44 áleýmettik nysan bar.
Bıyl Úkimet Pavlodar, Ekibastuz jáne Aqsý qalalarynda jylý jelilerin salýǵa jáne rekonstrýksııalaýǵa arnaıy rezervten 9 mlrd teńge bólindi. Atalǵan qarajat esebinen (3,6 mlrd teńge) Pavlodarda uzyndyǵy 2,5 shaqyrym bolatyn TM-13 jylý magıstrali salyndy. Bul 41,5 myń adam turatyn Pavlov – Shevchenko – Kataev kósheleri aýmaǵyndaǵy kóppáterli turǵyn úılerdi turaqty jylýmen qamtamasyz etýge múmkindik beredi. Al Ekibastuzda jalpy uzyndyǵy shamamen 4 shaqyrym bolatyn TM-1 jáne TM-3 jylý magıstraldarynyń ýchaskeleri rekonstrýksııalandy (3,6 mlrd teńge). Qalǵan 1,8 mlrd teńge Aqsýdaǵy №3,5 jáne 8 shaǵyn aýdandarda ornalasqan, uzyndyǵy 4,3 shaqyrym bolatyn oramishilik jylý jelilerin qaıta jańartýǵa aýdaryldy. Sońǵy 2 jylda atalǵan ýchaskelerde 40-tan astam aqaý tirkelgen. Rekonstrýksııa jumysy 1,5 myńnan astam turǵyndy sapaly jylýmen qamtamasyz etýge múmkindik beredi dep kútilip otyr.
Pavlodar oblysy