Parlament Senatynyń tóraǵasy Máýlen Áshimbaev bastaǵan AES salýdy qoldaý jónindegi Halyq shtabynyń músheleri Jetisý oblysyna kelip, óńir halqymen aldaǵy referendýmǵa qatysty ózekti máselelerdi, energetıka salasyn damytý baǵyttaryn talqylady. Sapar barysynda depýtattar sarapshylarmen, qoǵam qaıratkerlerimen birge óndiristik kásiporyndardyń eńbek ujymymen, belsendi jastarmen kezdesti.
Jetisý oblysynyń turǵyndarymen kezdesýde Senat tóraǵasy AES salý máselesine qatysty jalpyulttyq referendým «Halyq únine qulaq asatyn memleket» tujyrymdamasyn iske asyrýdyń jarqyn kórinisi ekenine nazar aýdardy. Sondaı-aq palata spıkeri bul bastamanyń strategııalyq sıpaty men el ekonomıkasyna tıgizer áserine toqtalyp, aldaǵy referendýmda árbir azamattyń daýsy mańyzdy ról atqaratynyn atap ótti.
«Prezıdentimiz Qasym-Jomart Toqaev 6 qazanda atom elektr stansasyn salý máselesine qatysty respýblıkalyq referendým ótkiziletinin jarııalady. Soǵan sáıkes biz ózderińizben atalǵan bastamany, jalpy energetıka salasyn damytý baǵyttaryn talqylaýǵa arnaıy kelip turmyz. Osy aptada ótetin jalpyulttyq referendým Qazaqstannyń odan ári damýy jolynda strategııalyq mańyzǵa ıe. Sondyqtan bárimiz judyryqtaı jumylyp, elimizdiń jáne óskeleń urpaqtyń bolashaǵyna zor áserin tıgizetin mańyzdy sheshimdi birge qabyldaýymyz kerek. Bul rette otandastarymyzdy referendýmǵa belsendi qatysyp, óz tańdaýlaryn jasaýǵa shaqyramyn», dedi M.Áshimbaev.
Sonymen qatar shtab músheleri aqparattyq jumys aıasynda kópbalaly analar, múmkindigi shekteýli jandar jáne áleýmettik az qamtylǵan sanattaǵy azamattar jumys isteıtin «Aısulý» tigin fabrıkasynyń ujymymen, qala qurylysymen aınalysatyn «Temirbeton» kásipornynyń qyzmetkerlerimen kezdesti. Jıyn barysynda otandyq óndirýshilerdi qoldaý máseleleri, osy baǵyttaǵy zańnamalyq normalar jáne referendýmnyń mańyzy keńinen talqylandy. Is-sharalar kezinde eńbek ujymdary óz pikirin bildirip, atom elektr stansasynyń paıdasy men odan týyndaıtyn táýekelderge nazar aýdardy.
О́ńir turǵyndarymen kezdesýde óndiriske qajetti jańa tásilderdi zerdeleýdiń, ınnovasııalyq tehnologııalardy engizýdiń ıgiligi sóz boldy.