Májilis Tóraǵasy Qabıbolla Jaqypov Eýropadaǵy qaýipsizdik jáne yntymaqtastyq uıymynyń Az ulttar isteri jónindegi Joǵarǵy komıssary Astrıd Týrspen kezdesti, dep habarlady Májilistiń baspasóz qyzmeti.
Q. Jaqypov meımanǵa Májilistiń uıymdastyrýymen ótetin QHA 20 jyldyǵyna arnalǵan «Qazaqstandyq jol: Birlik. Patrıotızm. Reformalar» halyqaralyq konferensııasyna qatysýǵa nıet bildirgeni úshin óz alǵysyn jetkizdi.
Osy rette Májilis Spıkeri Qazaqstan Prezıdenti Nursultan Nazarbaev saıasatynyń basym baǵyttarynyń biri – ultaralyq kelisim máselesi ekenin atap ótti.
Q. Jaqypovtyń aıtýynsha, bizdiń elimiz EQYU-men syndarly yntymaqtastyqty, sonyń ishinde, azamattyq turaqtylyqty qamtamasyz etý máseleleri boıynsha yqpaldastyqty óte joǵary baǵalaıdy.
Odan ári Májilis Tóraǵasy Qazaqstanda etnıkalyq toptardyń damýy, tiliniń, mádenıeti men ádet-ǵurpynyń saqtalýy úshin barlyq jaǵdaı jasalǵandyǵyna toqtaldy. Máselen, búgingi kúni bizdiń elimizde 97 myńnan astam oqýshy 37 mektepte, sondaı-aq, 171 aralas mektepte ózbek, tájik, uıǵyr tilderinde bilim alady. Sonymen qatar, Qazaqstan etnostarynyń 15 tilde 37 gazeti jáne 11 tilde jýrnaly shyǵady.
Astrıd Týrs Qazaqstanda Joǵarǵy komıssar keńsesi ashylǵan kúnnen bastap, tıimdi únqatysý ornap, QHA-men ózara belsendi is-qımyl júrgizilip kele jatqanyn atap ótti.
Taraptar sondaı-aq, Az ulttar ıntegrasııasy týraly jáne Qazaqstan halqy Assambleıasynyń is-tájirıbesi tóńireginde áńgime qozǵady.