Koreıa men Japonııa elderinde daýys berý ýchaskeleri jumysyn bastap ketti. Alǵashqy bolyp Seýldegi Qazaqstan azamaty daýys berdi. Bul týraly QR Syrtqy ister mınıstrligi habarlady, dep jazady Egemen.kz.
Sheteldegi barlyq daýys berý ýchaskesi Qazaqstannyń dıplomatııalyq ókildikteriniń aýmaqtarynda uıymdastyrylǵan.
Seýlde №390 jáne Tokıoda №393 daýys berý ýchaskeleri jergilikti ýaqyt boıynsha saǵat 07:00-de ashyldy.
Osylaısha, Qazaqstan azamaty Kamıla Maýtova alǵashqylardyń biri bolyp Koreıa Respýblıkasynda tańdaýyn jasady.
«Bul sheshimniń elimizdiń bolashaǵy úshin mańyzy zor, al referendým - qoǵamnyń barlyq kózqarastaryn eskerý, sheshim qabyldaýda ashyqtyqty qamtamasyz etý múmkindigi. Úkimet árkimniń pikirin tyńdaýǵa tyrysady jáne biz, azamattar úshin bul úderiske belsendi qatysý óte mańyzdy», dedi K.Maýtova.