Qyzylorda oblysyndaǵy 500 myńǵa jýyq daýys berýshiniń alǵashqy leginde 103 jastaǵy maıdanger Iаhııa Tasyrov óz tańdaýyn jasady. Saıası oqıǵalardan syrt qalmaıtyn soǵys ardageri birlik árqashan mańyzdy ekenin aıtty, dep habarlaıdy Egemen.kz.
«Biz «Alǵa tartqan ozady, keıin ketken tozady» degen támsilge bas ıgen halyqpyz. El úshin ózekti isterge úles qosýymyz kerek. Sondyqtan árbir saıası naýqan kezinde óz tańdaýymdy jasaımyn. Memlekettiń damýy keleshegimiz úshin qajet. Urpaqtarymyz aman bolsyn», dedi maıdanger.
О́ńirde daýys berýshiler qataryna engen 492 380 turǵyn 380 ýchaskede daýys bere alady. Daýys berý kúni azamattardy ýaqytsha tirkeý qyzmetimen aınalysatyn 5 onlaın ýchaske jumys isteıdi.