Dýshanbede dzıýdodan jastar arasyndaǵy álem birinshiligi aıaqtaldy. Bul jarysta elimizdiń 18 balýany baq synaǵanymen, solardyń tek ekeýine qola medal buıyrdy. Qalǵan órenderimiz qalyń toptyń arasynda qalyp qoıdy.
Pamır taýynyń eteginde asa jeńil salmaq dárejesinde óner kórsetken Talǵat Orynbasar qola medaldy ıelendi. Bastapqy básekelerde serbııalyq Matıko Jeremıka men qyrǵyz Adıs Orazmamatovty jeńgen jerlesimiz shırek fınalda tatamı qojaıyny Loıka Kýdbýdınovqa «goldan-skorda» ese jiberdi. Odan keıin jubanysh beldesýinde ıtalııalyq Vınchenso Manferlottıdi «ıpponǵa» tastasa, úshinshi oryn úshin tartysta álem birinshiliginiń fınalısi, Eýropa chempıony, ázerbaıjandyq Nızamı Imranovtyń aıaǵyn kókten keltirdi. Sóıtip, Talǵat álemdik dodada qatarynan ekinshi ret úshinshi tuǵyrǵa taban tiredi. 19 jastaǵy shymkenttik dzıýdoshy byltyr da qola medaldy qorjynǵa salǵan edi. Odan bólek, Orynbasardyń kadetter arasynda Azııanyń eki dúrkin chempıony, álem birinshiliginiń qola júldegeri, jastar arasynda qurlyq chempıony degen ataqtary bar.
81 kg salmaqtaǵy Azat Kúmisbaı da álem birinshiliginiń qola júldegeri degen ataqqa qol jetkizdi. Alǵashqy aınalymdarda mońǵol Nergýı Muńhbaıar, lıtvalyq Aıdas Pılesas, ýkraınalyq Igor Sýrkandy utqan ol shırek fınalda qytaılyq Van Janvýannan jeńildi. Jubanysh beldesýinde nıderlandyq Djoshýa de Langeden basym túsken Azat qola medal úshin básekede tájik Sýnatýllo Mýsoevty tize búktirdi.
Dýshanbede myna dzıýdoshylar jeńis tuǵyryna kóterildi: Erler – 60 kg: 1. Iаmato Fýkýda (Japonııa), 2. Loıka Kýdbýdınov (Tájikstan), 3. Talǵat Orynbasar (Qazaqstan) men Mýrodı Mýrodalıev (О́zbekstan). 66 kg: 1. Shýntaro Fýkýshı (Japonııa), 2. Toılı Muradov (Túrikmenstan), 3. German Kobes (Reseı) pen Alessıo de Lýka (Italııa). 73 kg: 1. Keıto Kıharo (Japonııa), 2. Iýsýke Takeshı (Japonııa), 3. Mardon Ravshanov (О́zbekstan) pen Muhıddın Asadýlloev (Tájikstan). 81 kg: 1. Lýa Djavahıshvılı (Grýzııa), 2. Van Djıangvan (Qytaı), 3. Azat Kúmisbaı (Qazaqstan) men Sýleıman Shýkýrov (Ázerbaıjan). 90 kg: 1. Komeı Kaavabata (Japonııa), 2. Egor Malkın (Reseı), 3. Álisher Samanov (О́zbekstan) pen Vadım Gımbovskıı (Moldova). 100 kg: 1. Muhammedsodyq Sodyqov (О́zbekstan), 2. Nozomı Mıkı (Japonııa), 3. Fares Mehoýk (Fransııa) pen Ajdar Bagırov (Ázerbaıjan). +100 kg: 1. Denıs Batchaev (Reseı), 2. Kanan Nasıbov (Ázerbaıjan), 3. Ibragım Tataroǵly (Túrkııa) men Saba Kardava (Grýzııa).
Qyzdar arasyndaǵy básekede qytaılyq Hýı Hınran (48 kg), japonııalyq Iroha Oı (52 kg), Rıko Honda (57 kg), fransııalyq Melkııa Oshekorn (63 kg), aýstrııalyq Elena Deng (70 kg), kolýmbııalyq Brenda Olaııa (78 kg), ońtústikkoreıalyq Lı Hendjı (+78 kg) syndy sportshylar altynnan alqa taqty.