Erte kelgenderge tosyn syı

Daýys berýge kelgen el aǵa­larynyń biri, jazýshy-jýrnalıst Saılaý Kóshkendi osy jerde jolyqtyrdyq.

– Atom elektr stansasyn salý týraly áńgime qozǵalǵannan beri buqaralyq aqparat quraldaryn úzbeı oqyp kelemin. Ásirese «Egemen Qazaqstan» betin­de bilikti mamandar salıqaly pikir aıtyp, bolashaq stansanyń qanshalyqty qajet ekenin, bul saýaldyń máni men mazmunyn jan-jaqty talqylap jazdy. Taqyrypty tereńnen tolǵap saralaǵan mamandardyń aıtýy­na qaraǵanda, bul – elimizdiń erteńine meılinshe zor yqpal etetin sharýa. Elektr qýatynsyz qoǵamnyń bolashaǵyn kóz aldyńa elestete almaısyń. О́zimniń azamattyq mindetimdi óteıin dep tańǵy saǵat alty jarymnan daýys berý ýchaskesine keldim. Ýchaske jumysy bastalǵansha azdap kútýge týra keldi, – deıdi S.Kóshken.

Ýchaskege 2 741 adam tirkelgen. Saǵat 10-da 150-ge jýyq adam daýys berip úlgerdi. Sálden keıin adamdar legi kóbeıdi, kishigirim kezek te paıda boldy. Osy bir kórinis­ke qarap jerlesterimizdiń el erteńine beıjaı qaramaıtynyn ańǵarýǵa bolady.

– Daýys berýshiler arasynda aǵa býyn ókilderi de, jastar da bar. Egde adamdar tańsáriden kelip daýys berdi. Olardyń arasynda jasy 80-nen asqan birneshe qart ta bar. Eń birinshi kelgen adamdarǵa syı-sııapatymyzdy jasadyq. Aǵa býyn el bolashaǵy úshin atqaratyn sharýany jaq­sy túsinedi. Al 18-ge jańa tolyp jatqan jastardyń el er­teńi­ne degen alańdaýshylyǵyn, boıyndaǵy jaýapkershiligin kórgen kezde rızashylyq sezim­ge bólenedi ekensiń, – deıdi ýchas­kelik komıssııanyń tóraıymy Qarlyǵash Tinahına.

Ýchaskeniń aldy­na azamat­tyq mindetin óteý­ge kelgen adam­darmen de tildes­tik. Ma­man­dandyrylǵan kúzet qyz­metiniń ókili Erbolat Qus­metov erteńgi upaqtyń aldynda jaýapty ekenin jetkizdi.

Aqmola oblystyq referen­dým ko­mıssııasynyń tór­aǵasy Manar­bek Sádýovtiń aıtýyna qaraǵanda, óńirde 513 254 daýys berýshi bar. Saǵat 10-ǵa deıin olardyń 17,18 paıyzy daýys berip úlgergen.

Aqmola oblysy