Almatylyqtardyń referendýmdaǵy belsendiligi tańerteńnen bastaldy. Alǵashqylardyń biri bolyp qala ákimi Erbolat Dosaev pen onyń zaıyby daýys berdi. Olar № 48 mektep-lıseıdegi № 388 daýys berý ýchaskesine keldi.
Referendýmdy aty ańyzǵa aınalǵan opera ánshisi, Memlekettik syılyqtyń laýreaty Bıbigúl Tólegenova da qoldady. № 559 daýys berý ýchaskesiniń ókilderi onyń turǵylyqty jerine bıýlletender qorabyn ákeldi. Halyq ártisi bul oqıǵanyń mańyzyn atap ótti. Onyń aıtýynsha, referendýmǵa qatysý – árbir azamattyń jaýapkershiligi.
«Mundaı sheshimder muqııat oılaýdy talap etedi, óıtkeni bul qazirgi jaǵdaıǵa ǵana emes, urpaǵymyzdyń bolashaǵyna da áser etedi. Men memleket úshin mańyzdy máselede óz daýsymdy bergenimdi maqtan tutamyn», dedi Bıbigúl Ahmetqyzy.
Megapolıste alǵashqylardyń biri bolyp óziniń tańdaý quqyǵyn qoǵam qaıratkeri Asyly Osman da paıdalanyp, Almaty mýzykalyq kolledjiniń №64 ýchaskesinde daýys berdi.
Parıjdegi HHHIII jazǵy Olımpııa oıyndarynyń bokstan qola júldegeri Nazym Qyzaıbaı da referendýmǵa qatysty. Ataqty sportshy óziniń azamattyq mindetin alǵashqylardyń biri bolyp oryndady.
Kıno jáne teatr aktrısasy, telejúrgizýshi Qaragóz Súleımenova da referendýmǵa qatysty. Ártis №77 orta mekteptegi №414 daýys berý ýchaskesinde daýys berdi.
«Árqaısymyz osyndaı is-sharalarǵa qatysýymyz kerek. О́ıtkeni olar balalarymyzdyń bolashaǵyna áser etedi. Referendým óz pikirin bildirip, óz tańdaýyn jasaýǵa múmkindik beredi», dedi Q.Súleımenova.
Almatyda referendýmǵa 50 jyldyǵyn toılaıtyn jup qatysty. Altyn toıyn atap ótip jatqan Nurǵalı Qanaev pen Orynsha Berdenova Jetisý aýdanyndaǵy №349 ýchaskede óz quqyǵyn paıdalandy. Mereıtoı ıeleri nemereleriniń bolashaǵyn eldiń jan-jaqty turaqtylyǵymen baılanystyrady.
Daýys berýge Ekinshi dúnıejúzilik soǵysynyń ardagerleri de qatysty. Olardyń arasynda ǵasyr jasaǵan maıdanger, II dárejeli Uly Otan soǵysy ordeniniń ıegeri jáne «Jaýyngerlik erligi úshin» medaliniń ıegeri Vıktor Izıýmnıkov te bar. Vıktor Karpovıchtiń aıtýynsha, azamattyq ustanymnyń jóni bólek.
«Men júz jasqa toldym, óz ómirimde kóp nárse bastan keshirdim. Árıne, jastardyń taǵdyryna nemquraıdy qaramaımyn, sondyqtan da men barlyǵynan referendýmǵa qatysyp, óziniń azamattyq jaýapkershiligin kórsetýge shaqyramyn», deıdi ardager.
ALMATY