Atyraý oblystyq aýmaqtyq referendým komıssııasynyń tóraǵasy Azamat Aımanakýmovtyń málimetinshe, daýys berý quqyna ıe azamattardyń sany – 411 880. Daýys berýdiń ashyqtyǵy men zańdylyǵyn baqylaıtyn 7 uıym akkredıttelgen.
«Bul kúni oblysta 283 referendým komıssııasy jumys istedi. Komıssııanyń 9-y – aýmaqtyq, 274-i – ýchaskelik. Atyraý qalasy men aýdandarda múmkindigi shekteýli jandarǵa 100-ge jýyq ınvataksı qyzmeti uıymdastyryldy. Ýchaskelerde 15-ke jýyq sýrdoaýdarmashy tartyldy. Ýchaskelerge taktıldi belgiler ornatyldy. Kózi nashar kóretin daýys berýshiler aýdıonusqany tyńdaǵannan keıin trafarettermen qamtamasyz etildi», dedi A.Aımanakýmov.
Onyń deregine súıensek, tirkeýi bolmaǵandyqtan, tizimge enbegen azamattardyń daýys berýine múmkindik jasaldy. Atyraý qalasyndaǵy 5 ýchaskede sondaı azamattarǵa qyzmet kórsetildi.
Munaıly óńirde vahtalyq aýysymmen jumys istep júrgen munaıshylar bar. Máselen, Jylyoı aýdanyndaǵy «Teńiz» ken ornynda 10 myń adam tirkelgen. Al Kaspıı teńiziniń otandyq sektoryndaǵy «Qashaǵan» ken ornynda 880-ge jýyq munaıshy jumys isteıdi.
«Munaı-gaz salasyndaǵy kásiporyndarda vahtalyq aýysymmen jumys isteıtin jumysshylar bar. Sol sebepten 38 ýchaskelik komıssııa vahtalyq qalashyqtarda daýys berýdi uıymdastyrdy. Barlyq ýchaske materıaldyq-tehnıkalyq jabdyqtarmen qamtamasyz etildi. Máselen, «Teńiz» ken ornynda 6 adamnan daýys berýge ótinish tústi. Atyraý oblysynyń aýdandary men elimizdiń ár óńirinen kelgen olardyń jumys ornynda daýys berýin uıymdastyrý úshin 7 referendým pýnkti ashyldy. Al Kaspıı teńizindegi «Qashaǵan» ken ornyndaǵy munaıshylardyń referendýmnan tys qalmaı, daýys berýine múmkindik jasaldy. Referendým komıssııasy Kaspıı teńizindegi ken ornyna tikushaqpen bıýlleten men jáshikti alyp bardy. Munaıshylar jumys ornynda daýys beredi», dedi A.Aımanakýmov.
Sondaı-aq «Embimunaıgaz» AQ munaıshylary da jumys ornynda daýys berdi. Qyzmetkerlerdi basqarý departamentiniń dırektory Beket Ǵubaıdýllınniń aıtýynsha, bul kásiporynnyń munaıshylary Jylyoı, Isataı, Maqat jáne Qyzylqoǵa aýdanyndaǵy ken oryndarynda vahtalyq aýysymmen jumys isteıdi.
«Referendýmǵa qatysý – ár azamattyń boryshy. Urpaǵymyzdyń bolashaǵy úshin tańdaý jasadyq. Bizdiń kompanııada 5 myń adam jumys isteıdi. Qazir aýysymdyq ádispen 1 664 adam óndiris basynda jumysta. Olardyń daýys berýi úshin barlyq jaǵdaı jasaldy. Munaıshylarmen birge merdiger mekemelerdiń 1 700-ge jýyq jumysshysy da daýys berýge múmkindik aldy», dedi B.Ǵubaıdýllın.
Atyraý oblysy