AQTО́BE. 28 qańtar. Aqtóbede S.Jıenbaev atyndaǵy oblystyq jasóspirimder kitaphanasy jańa ǵımaratqa qonys aýdardy. Bul týraly egemen.kz tilshisi habarlady.
Nysannyń ashylýyna oblystaǵy zııaly qaýym ókilderi men oqyrmandar qatysty. Atalǵan kitaphana 1979 jyly qurylyp, oǵan 2000 jyly aqyn Saǵı Jıenbaevtyń esimi berildi. Seksen myńǵa jýyq kitap qory bar kitaphana osy ýaqytqa deıin «Alaqaı» qýyrshaq teatrynyń ǵımaratynda ornalasyp kelgen bolatyn. Oblys ákimdigi men oblystyq mádenıet, muraǵattar jáne qujattama basqarmasynyń tarapynan qoldaý kórsetilip, Prohorov kóshesiniń boıyndaǵy buǵan deıin Zaýyt polısııa bólimshesi bolyp kelgen eski nysan kitaphana menshigine berildi. О́tken jyly respýblıkalyq bıýdjetten 47 mıllıon teńge bólinip, ǵımarattyń ishi, syrty qaıta jańardy. Jańarǵan nysan kitaptardy saqtaýǵa, oqyrmandarǵa sapaly qyzmet kórsetýge jáne kitaphana qyzmetkerleriniń erkin jumys isteýine óte qolaıly. Oqyrmandar úshin de barlyq jaǵdaı jasalǵan. Múmkindigi shekteýli jandar úshin arnaıy pandýs ornatylǵan. Oblystyq mádenıet, muraǵattar jáne qujattama basqarmasy tarapynan kitaphananyń materıaldyq-tehnıkalyq bazasyn nyǵaıtý úshin bir mıllıon teńge bólingen.
Kitaphanada abonement, oqý zaly, ınnovasııalyq jáne ádistemelik jumys bólimi, ınternet zal, qujattardy jınaqtaý, óńdeý, katalogtardy uıymdastyrý jáne óner jónindegi ádebıetter bólimi jumys isteıdi. Kitap qoryn elektrondy nusqaǵa aýystyrý jumystary da júıeli júrgizilýde.
Satybaldy Sáýirbaı.
Derek: egemen.kz.
Sýret: aktobe.gov.kz.