Mańǵystaý óńirinde áskerıler dástúrli oqý-jattyǵýyn ótkizdi. Áskerı-teńiz kúshteriniń jıyn-joryǵynda teńiz jaıaý áskerleri desanttyq-shabýyldaý batalonynyń jeke quramy Kaspıı teńiziniń jabdyqtalmaǵan jaǵalaýyna desant túsirý men plasdarmdy basyp alý operasııalaryn sátti oryndady.
Oqý-jattyǵý shartty qarsylastyń desantqa qarsy qorǵanysyn buzyp ótýden bastaldy. Atysty qoldaý kemeleriniń tikeleı artıllerııalyq soqqylary tapsyrmany oryndaýdy edáýir jeńildetti. «Qaısar» qaıyǵymen jetken desantshylar birden jaǵalaýdy basyp alýǵa kiristi.
Urys barysynda shabýyldaý toptary qarsylastyń atys núktelerin joıyp, alǵy shepke ornyǵyp aldy. Bul taktıkalyq teńiz desantynyń negizgi kúshterin túsirýdi qamtamasyz etýge múmkindik berdi. Jattyǵý barysynda áskerı qyzmetshiler úılesimdi áreket etti. Joǵary uıymshyldyq júktelgen tapsyrmalardy minsiz oryndaýǵa sep boldy.
Mı-8 kóliktik-shabýyldaý tikushaqtary desanttyq toptardy shartty qarsylastyń tylyna jetkizý arqyly áýeden qoldaý kórsetti. Jaýyngerlik tikushaqtar juby qonýdy qamtamasyz etý men jerdegi nysandardy joıýda mańyzdy ról atqardy.
– Jazǵy kezeńdegi josparlanǵan is-sharalar tolyǵymen aıaqtaldy. Endi jeke quram batalondyq-taktıkalyq oqý-jattyǵýlarǵa jáne Qarýly kúshter Bas shtaby komıssııasynyń qorytyndy tekserýine daıyndalyp jatyr, – dedi áskerı-teńiz bazasynyń komandıri 2-dárejeli kapıtan Baýyrjan Muratuly.
Júzden asa áskerı qyzmetshi qatysqan manevrlerge zymyran-artıllerııalyq kemeler men qaıyqtardy, sondaı-aq kóliktik jáne jaýyngerlik tikushaqtardy qosa alǵanda, onnan asa áskerı jáne arnaıy tehnıka jumyldyryldy. Áskerı qyzmetshilerdiń jaýyngerlik daıyndyǵynyń mańyzdy bóligine aınalǵan oqý-jattyǵý teńiz jaıaý áskerleriniń naqty urys jaǵdaıyndaǵy tapsyrmalardy oryndaýǵa daıyndyǵyn dáleldedi.