Sońǵy birneshe jyl bederinde Taraz tórinde «Kúzgi áýen» ataýymen klassıkalyq ánder keshi turaqty túrde uıymdastyrylyp júr. Sara kúzdiń ińiri de salqyn keledi. Soǵan qaramastan ashyq aspan astynda ótetin keremet keshti tarazdyq ónersúıer qaýym asyǵa kútedi. Olar úshin saıabaqtyń salqynyn altyn daýys ıeleriniń óneri jylytyp jiberetin sekildi. Áıteýir óner keshin tamashalaýshylardyń sany eshqashan azaıǵan emes.
Dástúrge saı «Kúzgi áýen» keshi bıyl da uıymdastyryldy. «Jeńis» saıabaǵyna aǵylǵan jurt Qazaqstannyń eńbek sińirgen ártisi Maıra Muhamedqyzy bastaǵan bekzat óner ıeleriniń daýsyn saǵynyp-aq qalǵan sııaqty. Kim bilsin, solaı da shyǵar. Áıteýir óner keshin tamashalaýǵa kelgenderdiń kóbisin jyǵa tanymasaq ta, shyramytatyn bolyppyz. Bálkim olar dál osy keshke jyl saıyn keletin bolar.
Kúzdiń salqyn samaly kekilińdi taraıtyn ińirde bastalǵan óner keshinde Memlekettik syılyqtyń laýreaty Maıra Muhamedqyzy halyq áni «Búldirgen» men «Gúlderaıym» ánin shyrqap, jergilikti jurtshylyqtyń janyn jylytty. Maıranyń myń qubylta quıqyljytyp shyrqaǵan altyn daýsy saıabaqqa jınalǵan jurtshylyqty elitip jiberse kerek, olardyń qoshemeti uzaqqa sozyldy.
Bekzat óner saltanat qurǵan kesh barysynda Súndet Baıǵojın oryndaǵan «Irodanyń arııasy», «Kazakh Quartet» ujymy jurttyń júregine jetkizgen Vıvaldı men Mosarttyń áıgili týyndylary da ónersúıer qaýymdy beıjaı qaldyrǵan joq. Sondaı-aq áýlıeatalyq áleýmet Shyńǵys Aıtmatovtyń áıgili «Jámılá» shyǵarmasynyń jelisimen jazylǵan Ilıa Jaqanovtyń «Danııardyń áni» týyndysyna da aıryqsha qoshemet kórsetti. Jumabek Qańtarbaev óz deńgeıinde oryndap shyqqanyn aıta ketken jón.
Kúzdiń salqyn samalyndaı adam janyn baýraǵan «Kúzgi áýen» klassıkalyq ánder keshin áýlıeatalyq áleýmetpen birge oblys ákiminiń orynbasary Serik Sálemov, Taraz qalasynyń ákimi Baqytjan Orynbekov bastap ózge de sheneýnikter tamashalady. О́ner áleminde óz bıigin baǵyndyrǵan belgili ánshilerdiń sheberligine jergilikti jurtpen birge qurmet kórsetti.
Taraz