Parlamenti Senatynyń spıkeri, Álemdik jáne dástúrli dinder lıderleri Sezi hatshylyǵynyń basshysy Máýlen Áshimbaev Astanada ótken Álemdik jáne dástúrli dinder lıderleri Sezi hatshylyǵynyń XXII otyrysy aıasynda din kóshbasshylarymen, halyqaralyq uıymdardyń basshylarymen birqatar ekijaqty kezdesý ótkizdi.
Onda taraptar Sezdi damytýdyń 2033 jylǵa deıingi tujyrymdamasyn iske asyrý baǵytyndaǵy basymdyqtardy belgiledi. Sondaı-aq kelesi jyldyń qyrkúıeginde Astanada ótetin Álemdik jáne dástúrli dinder lıderleriniń VIII sezine daıyndyq josparyn talqylady.
Qasıetti Taqtyń dinaralyq dıalogi jónindegi Dıkasterııasy Islam máseleleri bıýrosynyń basshysy monsenor Haled Akashemen kezdesýde suhbattasýshylar Sezd hatshylyǵy men Qasıetti Taqtyń jemisti yntymaqtastyǵyna nazar aýdardy. Kezdesýde Qasıetti Taq Qazaqstannyń konfessııaaralyq jáne dinaralyq kelisimdi ilgeriletý jónindegi bastamalaryna únemi qoldaý kórsetip kele jatqany da sóz boldy. Sondaı-aq taraptar aldaǵy on jylǵa arnalǵan Sezd tujyrymdamasyn iske asyrý aıasyndaǵy mańyzdy mindetter jóninde pikir almasty.
Sonymen qatar Máýlen Áshimbaev Qytaı býddıster qaýymdastyǵynyń vıse-prezıdenti Chjen Semen kezdesti. Is-sharada adamzatty alańdatqan ózekti problemalardy sheshýde jas din lıderleriniń áleýetin tıimdi paıdalaný máselesi áńgimege arqaý boldy. Hatshylyq basshysy bul oraıda Álemdik jáne dástúrli dinder lıderleri sezi men VI Dúnıejúzilik býdda forýmynyń kózdegen maqsattary úndes ekenine nazar aýdardy.
Musylman aqsaqaldar keńesiniń Bas hatshysy Muhammed Ábdelsalammen kezdesýde Máýlen Áshimbaev meımandy sezdiń Izgi nıet elshisi bolyp saılanýymen quttyqtady. Sondaı-aq oǵan Forým ıdeıalaryn qoldaǵany, olardy júzege asyrýǵa qosqan belsendi úlesi úshin alǵys bildirdi. Suhbat kezinde Musylman aqsaqaldar keńesi men Álemdik jáne dástúrli dinder lıderleriniń seziniń jahandyq dinaralyq jáne órkenıetaralyq dıalogti odan ári damytý jolyndaǵy ózara is-qımyl máseleleri de nazardan tys qalǵan joq.
О́z kezeginde mártebeli meımandar Qazaqstannyń toleranttylyq pen kelisim sııaqty qundylyqtardy dáripteý baǵytynda atqaryp otyrǵan aýqymdy jumysyn joǵary baǵalap, alǵysyn jetkizdi. Buǵan qosa olar yntymaqtastyqty odan ári nyǵaıtýǵa jáne 2025 jylǵy 17-18 qyrkúıekte «Dinder dıalogi: bolashaq jolyndaǵy sınergııa» degen taqyryppen ótetin Álemdik jáne dástúrli dinder kóshbasshylarynyń VIII sezine qatysýǵa daıyn ekenin atap ótti.