Áýeli Jambyl oblysynda qanatqaqty joba retinde bastalǵan «Aýyl amanaty» jobasy keıinnen Prezıdent pármenimen elimizdiń ózge de óńirlerinde jalǵasyn tapty. Aýyl sharýashylyǵy taýar óndirýshilerin, kásip bastaýǵa nıetti eldi meken turǵyndaryn qoldaý maqsatynda qolǵa alynǵan aýqymdy joba óz tıimdiligin kórsetip otyr.
Sońǵy birneshe jyl bederinde óńirdiń ondaǵan aýylynda turatyn qarapaıym halyq dál osy «Aýyl amanaty» jobasynyń paıdasyn kórgenine eshkimniń daýy joq. Bastapqyda iri qara mal ósirý maqsatynda jeńildetilgen paıyzben beriletin nesıege qol jetkizgen aýyl turǵyndary keıin ózge kásipke de bet bura bastady. Atakásipti qolǵa alǵandar da tolaıym tabysqa qol jetkize bastady.
«Prezıdent pármenimen elimizdiń ár qıyrynda jalǵasyp jatqan «Aýyl amanaty» jobasy óziniń tıimdiligin kórsetkenine eshkimniń kúmáni joq. Jergilikti aýyl sharýashylyǵy taýaryn óndirýshilerdi jan-jaqty qoldaýǵa, aýyl halqyn kásipkerlikke tartýǵa baǵyttalǵan baǵdarlamanyń sharapatyn kórip otyrǵan otbasylar jetkilikti. Olardyń sany jyl ótken saıyn arta túsetini de málim. Nátıjesinde, jańa jumys oryndary paıda bolyp, aýyl halqynyń tabysy eselene tústi. Joba aıasynda atqarylǵan jumys jetkilikti. 2023 jyly 25,5 mlrd teńge qarajat qarastyrylǵan bolatyn. Bólingen qarjy esebinen 4 076 joba ýaqtyly qarjylandyryldy. 51 aýyldyq okrýg turǵyndary baǵdarlamanyń sharapatyn kórdi», deıdi Jambyl oblysynyń ákimi Erbol Qarashókeev.
О́ńir basshysy keltirgen derekke júginsek, ótken jyly joba aıasynda nesıe alǵandar 152,2 myń bas mal, 65 birlik aýyl sharýashylyǵy tehnıkasyn satyp alypty.
Rasynda, aýqymdy joba aıasynda jeńildetilgen paıyzben nesıe alǵan azamattar jetkilikti. Oblys ákiminiń orynbasary Ábilhaıyr Tamabektiń aıtýynsha, ótken jyly mal satyp alýǵa nıet bildirgen 4 012 aýyl turǵynynyń ótinishi qanaǵattandyrylǵan. Sondaı-aq jeke kásibin ashýǵa nıettengen 43 azamattyń jobasy qarjylandyrylypty. Atqarylǵan jumystyń nátıjesinde 4 152 jańa jumys orny ashylǵan.
Aýyldan irgesin alystatpaı, baıandy bastamanyń paıdasyn kórip otyrǵan otbasylar jetkilikti. Olardyń deni mal alyp, atakásipti damytýǵa den qoıǵan. Máselen, Jýaly aýdanyna qarasty Alataý aýylynyń turǵyny Ásemgúl Toqtasynova kórshiles Jambyl aýdanynan 110 bas qoı satyp alǵan eken.
«Qazir qandaı da bir isti bastaımyn, kásip ashamyn degen azamatqa memleket tarapynan aıtarlyqtaı qoldaý kórsetilip jatyr. «Aýyl amanaty» baǵdarlamasy arqyly biz de nesıe alyp, atakásipti jalǵastyrýǵa den qoıdyq. Qazaqta «elde bolsa, eringe tıedi» degen sóz bar. Qysqasy, shamamyz kelgenshe eńbektenip jatyrmyz. Adal eńbekpen nápaqasyn aıyramyn degenderde múmkindik mol. Tek nıet kerek. Sonda ǵana tabysty bolasyń», deıdi ol.
Erinbegen adamǵa jumys isteýge múmkindik jetkilikti. О́ńirdiń on aýdanyndaǵy «Aýyl amanaty» baǵdarlamasyna engen aýyl turǵyndarynyń barlyǵy da osyny aıtyp júr.
«Osy jyldyń aıaq tusynda respýblıkalyq bıýdjetten 10,5 mlrd teńge kóleminde qarajat bólýdi kútip otyrmyz. Bul qarjyǵa kem degende 1 200 joba qarjylandyrylady. Aldaǵy ýaqytta shaǵyn orta bıznesti, máselen, qurylys, kondıterlik, tigin sehtaryn, aýyl sharýashylyǵy ónimderin qaıta óńdeý men shaǵyn sehtardy damytýdy qolǵa alamyz. Osy baǵyttardy qarjylandyrýǵa kóńil bólemiz», deıdi óńir basshysy.
Jalpy, «Aýyl amanaty» baǵdarlamasy aıasynda 2,5 paıyzben jeke kásipkerlik ashýǵa nıet bildirýshilerdiń 7 jylǵa deıingi merzimge 9,5 mln teńgege deıin nesıe alýǵa múmkindigi bar. Al kooperatıvterge 29,2 mln teńge somasynda nesıe beriledi.
Jambyl oblysy