Qazaq án ónerinde daryndy dırıjer, Qazaqstannyń eńbek sińirgen qaıratkeri Álı Alpysbaevtyń esimi erek. «Toıyń toıǵa ulassyn», «Dosym» sekildi el júregine qonystanǵan tańdaýly ánderi halyq jadynda máńgi qalmaq. Tipti shyǵarmalary shetel asyp, qazaq ónerin aspandatyp keledi. Oǵan dálel tuńǵysh ret ótken «Elge arnaý» halyqaralyq ánshi-vokalıster men jeke aspapta oryndaýshylar baıqaýy.
Qazaqstan kompozıtorlar odaǵynyń 85 jyldyǵyna oraı uıymdastyrylǵan I halyqaralyq «Elge arnaý» óner dodasyna qatysqan ónerpazdar tek avtordyń shyǵarmalaryn oryndady. Eki kúnge sozylǵan óner báıgesi eldiń erekshe yqylasyna ıe boldy. Sazgerliktiń azabyn tatyp, syry men syny ketpeıtin saz týyndatýdyń mashaqatyna tózý – úlken mahabbattan týyndasa kerek. Osy jolǵa tutas ómirin arnap kele jatqan óner ıesi saltanatty sharada halyqqa rızashylyǵyn jetkizdi.
«Jetisý jurtyna degen yqylasym sheksiz. Men sazgerlik, jalpy mýzyka ónerine tóteden kıligip, tosynnan qosylǵan jan emespin dep bilemin. Aq jórgekke ánmen oranyp, kúımen býylyp, talbesikte ana áldıin tyńdap óstim. Qulyndaı quldyrańdap ósken shaǵym búginge deıin kóz aldymnan ketken emes. Sol kezdegi aýylymnyń ájeleri salǵan tamasha áýender áli de qulaǵymda júr. Sol sebepti, ónerge kezdeısoq kelmedim dep aıtýǵa tutastaı quqym bar», dedi Á.Alpysbaev.
Baıqaýǵa О́zbekstannyń halyq ártisi Farýh Sadykov, Qyrǵyzstannyń halyq ártisi Tilek Naımanbaev, Qazaqstannyń halyq ártisi Nurjamal Úsenbaeva, qazaq mýzyka óneriniń maıtalmandary Janat Shybyqbaev, Dúısen Orynbaı, Torǵyn Smaılova qazylyq etti. Olar júzge tarta qatysýshynyń ishinen úzdikterdi tańdady.
«Álı Demegenuly – I.Jansúgirov atyndaǵy óner ordasyn basqarǵanda, ujymdy qanattandyryp qana qoımaı, talaı beleske bastaǵan basshy. Alpystan asqan el aǵasy baǵyndyrǵan asýlardyń ózi bir kitapqa arqaý bolarlyqtaı. Búginde M.Tólebaev atyndaǵy fılarmonııanyń orkestrine dırıjerlik etip, keshegi Nurǵısa Tilendıev syndy tulǵalar salǵan sara joldyń sańlaǵy ekenin dáleldep júr. Bul árıne, bir ǵana jetistigi», dedi N.Úsenbaeva.
Atalǵan óner dodasynda júldeli orynǵa ıe bolǵan jeńimpazdardyń bárine qarjylaı syılyq berildi. Topty jarǵan túrki balalary ónerin ortaǵa salyp, jetisýlyqtardy bir jelpindirdi.
Jetisý óńirinde «Álı – áýen, Álı – jyr» atty án bar, osyǵan oraı kompozıtordyń artynan ergen ańyz da jeterlik. Ońtústik jaqqa barǵan kompozıtordyń «Dosym» degen tamasha ánin tyńdaǵan kásipker azamattyń biri avtorǵa jeńil avtokóligin syıǵa bergen eken. Munyń ózi án qanatynda terbelgen azamattyń jomarttyǵy bolsa, tyńdarmandy sondaı kúıge bólegen týyndyny ómirge ákelgen sazgerdiń talantyna jasalǵan qurmet dep bilemiz.
Álı Alpysbaevtyń boıynda babadan qalǵan tektilik bary anyq. Oǵan dálel, árqashan muqym eldiń máńgilik murasyn jıi nasıhattaıtyndyǵynda. San márte konserttik saparmen Qytaı, Túrkııa, Polsha, Úndistan, Bolgarııa jáne Reseıdiń iri qalalarynda bolyp, kóptegen halyqaralyq mýzykalyq forým men festıvalderge qatysty. Sonymen qatar dırıjer-kompozıtor retinde otandyq iri sahnalarda óziniń ónerin san márte moıyndatyp, tyńdarmandaryn súısindirip keledi. О́ziniń aıtýynsha, júzdegen ánniń, áldeneshe iri kúı-poemalardyń jáne dombyraǵa arnap jazylǵan 3 bólimdi konserttiń avtory. Teatrda sahnalanǵan 10-ǵa jýyq qoıylymǵa mýzyka jazyp, ánderi men shyǵarmalarynan quralǵan «Aýyldaǵy toı», «Ánimdi sizge arnadym» atty jınaqtary jaryq kórgen. Bul erteńge ańyz bolar bir adamnyń shyǵarmashylyq áleýetiniń kórsetkishi, esimin áıgilep turatyn darynnyń ǵumyrnamasy.
Jetisý oblysy