Elordada QR Týrızm jáne sport mınıstri Erbol Myrzabosynovtyń tóraǵalyǵymen IX qysqy Azııa oıyndaryna ulttyq quramanyń daıyndyǵyna arnalǵan jıyn ótti. Baıraqty báseke 2025 jyldyń 7-14 aqpanynda Qytaıdyń Harbın qalasynda ótedi, dep habarlaıdy Egemen.kz mınıstrliktiń baspasóz qyzmetine silteme jasap.
Is-sharaǵa mınıstrlikke baǵynysty uıymdardyń basshylary, qysqy sport túrleri federasııalarynyń bas hatshylary, memlekettik jattyqtyrýshylar jáne ulttyq qurama komandalarynyń bas jattyqtyrýshylary qatysty.
Jıynda Erbol Myrzabosynov qysqy Azııa oıyndarynyń bastalýyna sanaýly aı qalǵanyn eske salyp, sary qurlyq dodasyna quramany tynǵylyqty daıyndaýǵa qatysty naqty máselelerdi ashyq talqylaý kerek ekenin jetkizdi.
«El namysy synalatyn osyndaı halyqaralyq dodalarda ulttyq quramanyń tabysty óner kórsetýi Qazaqstannyń ımıdjin kóteredi. Qysqy Azııa oıyndarynda bizdiń sportshylar táýir nátıje kórsetip júr. Sondyqtan aldaǵy baıraqty básekede joǵary jetistikke jetý úshin bar kúshimizdi salý qajet», dedi Týrızm jáne sport mınıstri.Sondaı-aq jıynda elimizde qysqy sport túrlerin damytý máseleleri de talqylandy.
Aıta keteıik, qysqy Azııa oıyndary 1986 jyldan beri turaqty túrde ótkizilip keledi. Al Harbın atalǵan oıyndardy osymen ekinshi márte qabyldamaq. Birinshi ret 1996 jylǵy ótkizgen bolatyn. Aldaǵy oıyndarda 11 sport túrinen júldeler sarapqa salynady. Sportshylar short-trek, konkımen júgirý, mánerlep syrǵanaý, shaıbaly hokkeı, kerlıng, taý shańǵysy, snoýbordıng, frıstaıl, shańǵy jarysy, bıatlon jáne shańǵy alpınızminen synǵa túsedi.