Shveısarııa men AQSh ınjenerleri tiri neırondardan jasalǵan jasandy zerde arqyly basqarylatyn bıogıbrıdti robot jasap shyǵardy. Pishini kóbelekke uqsas qurylǵy symsyz basqarý júıesiniń arqasynda sýda júze alady ári múltiksiz manevrlar jasaıdy.
Adamnyń dińgek jasýshalarynan alynǵan qozǵaltqysh neırondar men kardıomıosıtterdi birge ósirý arqyly qalyptasqan neırobulshyqet júıesi – robottyń negizgi ereksheligi. Jasýshalar ekijaqty jyldam baılanystardyń qalyptasýyna múmkindik beretin arnaıy mıkroflıýıdti qurylǵyda ósirilgen.
Zertteýshiler jıilikti mýltıpleksteý júıesin paıdalana otyryp, robot mıynyń neırondaryn iske qosqan. Bul júzgishterdiń qozǵalysyn baqylaýǵa, júzý jyldamdyǵy men baǵytyn retteýge kómektesedi.
Synaq barysynda robot 0,52 mm/s jyldamdyqta jyljyp, júzgishterimen sekýndyna eki retke deıin qozǵalys jasaǵan. Sondaı-aq ol ár mıllımetrge 0,11 radıan qısyq jasap aınala alǵan.
Kóptegen bıorobottan aıyrmashylyǵy, bul – adam júıke júıesi biriktirilgen alǵashqy júıe. Atalǵan robot qorshaǵan ortanyń ózgeristerine tıimdi beıimdelýge múmkindik beredi. Zertteýshiler ózderiniń ázirlemesi bolashaqta qorshaǵan orta sıgnaldaryn qabyldap úırene alatyn kúrdeli bıogıbrıdti qurylǵylar jasaýǵa negiz bola alatynyn aıtady.