Astana qalasynda qazirgi zamanǵy jáne qýatty tehnologııamen jabdyqtalǵan konteınerlik alańy bar kóliktik-logıstıkalyq ortalyqtyń (KLO) qurylysy aıaqtalýǵa jaqyn. Der kezinde qolǵa alynǵan jalpy quny 151 mıllıon dollar turatyn aýqymdy jobaǵa «QTJ» UK» AQ enshiles kásiporny «KTZ Express» AQ arqaý bolýda.
Elbasy Nursultan Nazarbaev elimizdiń barlyq deńgeıdegi ınfraqurylymyn damytý máselesine birinshi kezekte basymdyq berip otyr. Memleket basshysy «Nurly Jol – bolashaqqa bastar jol» atty Joldaýynda «Birinshi. Kóliktik-logıstıkalyq ınfraqurylymdardy damytý. Ol makroóńirlerdi habtar qaǵıdaty boıynsha qalyptastyrý aıasynda júzege asyrylatyn bolady. Onyń ústine, ınfraqurylymdyq qańqa Astanamen jáne makroóńirlerdi magıstraldi avtomobıl, temirjol jáne áýe joldarymen shuǵyla qaǵıdaty boıynsha ózara baılanystyrdy», dep atap kórsetti. Osyǵan baılanysty elimizdiń óńirlerinde kóliktik-logıstıkalyq habtardy qurý isi qolǵa alyndy. Sonyń biri Astana qalasyndaǵy kóliktik-logıstıkalyq ortalyq bolmaq.
A273 kóshesi men Astana – Qaraǵandy tas jolynyń qıylysynda, Qyrqynshy stansanyń mańaıynda ornalasqan, úlken konteınerlik alańy, qurǵaq jáne klımattyq júk saqtaý qoımasy, alyp saýda ortalyǵy bar kóliktik-logıstıkalyq ortalyqtyń qurylys aýmaǵynda abattandyrý jumysy qyzý júzege asyrylýda. Sóıtip, EKSPO-2017 halyqaralyq kórmesine jan-jaqty daıyndyq ústindegi elordada tıimdi logıstıkalyq tizbek qalyptaspaq. Máselen, qaýyrt qımyldardyń nátıjesinde qoımalar keshenine jetkizilgen taýarlar tıisti sórelerge ornalastyrylady. KLO ortalyǵynda qazir tońazytqysh-muzdatqysh kameralar iske qosylyp, taýar saqtalatyn qoımalar synaqtan ótkizilýde.
– Birinshi, negizgi kezeń máre syzyǵyn kesýge taqalyp, ekinshi kezektegi jumystar kóp kúttirmeı bastaý alady dep josparlanýda. Jumys kólemi kóp, olardy ýaqtyly eńserýge tyrysýdamyz. Jalpy, kóliktik-logıstıkalyq ortalyqtardyń artyqshylyǵy sol, kólik qatynasyna da, óndiristik-tehnıkalyq, ónerkásiptik júk pen halyq turmysynda keńinen qoldanylatyn kez kelgen azyq-túlik taýarlaryn túsirip, qaıta tıeýge de, shoǵyrlandyryp, óńdeý qyzmetterin kórsetýge de yńǵaıly bolýy tıis. Búginde Astana jáne Shymkent shaharlarynda «A+» synybyndaǵy zamanaýı KLO qurylystary salynyp, paıdalanýǵa berilýde. Bilikti mamandar tusaýkeser rásimderinen soń ıgilikti isterge bilek sybana kirisedi, – deıdi Astana KLO qurylysyn basqarý men baqylaýǵa jaýapty «Continental Logistics» JShS-niń tehnıkalyq dırektory Tilekjan Nurkenov.
Astana kóliktik-logıstıkalyq ortalyǵy bolashaqta halyqaralyq jáne respýblıkalyq, qalalyq jáne óńirlik júk aǵynyn ortaq arnada toǵystyrmaq. Jańa temirjol vokzalymen kórshiles 51 gektar jer telimindegi alǵashqy qurylys kezegi aıaqtaldy. Paıdalanýǵa berilgen qurǵaq júk qoımasynyń aýmaǵy 27650 sharshy metrdi, klımattyq qoıma 11520 sharshy metrdi quraıdy. Konteınerlik alań 8 gektar jerdi alyp jatsa, saýda úıi 24000 sharshy metrdi alyp jatyr. Kelesi kezekte ákimshilik-turmystyq keshen men qonaqúı turǵyzylady eken.
Konteınerlik termınaldarǵa jeke-dara toqtalsaq, alań plıtalary 100 tn/m2 júktemeni qınalmaı kóterip, bul aýmaqqa bir ýaqytta 4000 TEU júk ornalasady. Konteınerlik kran birden 45 tonna júk kóteredi. Osy oraıda, bertinge deıin burynǵy Keńes odaǵy dáýirinen qalǵan ınfraqurylymdy paıdalanýǵa májbúr bolǵan elimizde termınal-qoımalar jelisi halyqaralyq baǵalaý dárejesinde sońǵy «S» sanatyna jáne odan da tómen jaıǵasqany biraz jaıtty ańǵartsa kerek. Endi ortalyqtandyrylǵan, kedendik qosyny kádege jaraıtyn, jabyq nemese ashyq vagondardy stansadan jetkizý, kedendik resimdeý, aqaýlardy suryptaý, jaramsyzyn joıý syndy qosymsha qyzmettermen shuǵyldanatyn kóliktik-logıstıkalyq ortalyq naryqqa sony lep ákelmek. Taǵy bir aıta ketetin másele, et pen balyq, jemis-jıdek, kókónis sekildi taǵam túrleriniń tez buzylmaýyna refrıjeratorlar qyzmet kórsetpek.
Eskendir ERTAEV,
«QTJ» UQ» AQ buqaramen baılanys departamentiniń menedjeri.
Sýrette: kóliktik-logıstıkalyq ortalyqtyń qurylysy aıaqtalýǵa jaqyn.