Abaı atyndaǵy Qazaq ulttyq pedagogıkalyq ýnıversıteti halyqaralyq yntymaqtastyqty keńeıtý, pedagogıkalyq tájirıbe almasý maqsatynda jetekshi sheteldik ǵalymdardy shaqyrǵan bolatyn. Ǵylym jáne joǵary bilim mınıstrliginiń qoldaýymen iske asqan is-shara barysynda sheteldik ǵalymdar men oqytýshylar óz tájirıbesimen bólisti.
Býrsa Ýlýdag ýnıversıtetiniń professory Salıh Chepnı, Trabzon ýnıversıtetiniń professory Mýammer Chalıh (Túrkııa) jáne Okaıama ýnıversıtetiniń professory Hırokı Fýdjı (Japonııa) ýnıversıtettiń jaratylystaný jáne geografııa fakýltetiniń bilim alýshylaryna dáris pen semınar ótkizip, oqytýshylarmen, jas ǵalymdarmen tájirıbe almasty.
Pedagogıkalyq tájirıbe men ozyq ınnovasııalarmen almasý alańyn qalyptastyrýda sheteldik ǵalymdarmen ózara baılanys ornatý zamanaýı bilim tehnologııalaryn engizýge, jańa formasııadaǵy básekege qabiletti mamandardy daıarlaýǵa yqpal etedi. Ýnıversıtettiń bastamasymen ǵalymdar Oraz Jandosov atyndaǵy №105 gımnazııada bolyp, ýnıversıtet pen mektep arasyndaǵy baılanysty nyǵaıta tústi.
Sapar barysynda sheteldik professorlar elimizdegi mektepterdiń kúndelikti qyzmetimen tanysyp, oqýshylarmen jáne ustazdarmen bilim júıesiniń erekshelikterin talqylap, oqý úrdisinde qoldanylatyn ınnovasııalyq tásilderdi zerdeledi.
Abaı ýnıversıtetiniń bastamasy otandyq mektep oqýshylary men muǵalimderine halyqaralyq sarapshylarmen bilim jáne tájirıbe almasýǵa biregeı múmkindik berdi. Shetel professorlarynyń pikirinshe, tájirıbe almasý kásibı damýǵa yqpal etip, qatysýshylardyń kókjıegin keńeıtip, zamanaýı bilim berý ozyq ádis-tásilderin tereńirek túsinýge jaǵdaı jasaıdy.
Ýnıversıtet basshylyǵy mundaı is-sharalar ártúrli damyǵan eldiń bilim mekemeleri arasyndaǵy yntymaqtastyqty nyǵaıtýǵa yqpal ete otyryp, birlesken ǵylymı jáne bilim jobalary úshin jańa baǵyttarǵa jol ashady degen senimde. Bul bastamalar halyqaralyq baılanystardy nyǵaıtyp qana qoımaı, joǵary oqý oryndary men mektepterdegi bilim sapasyna oń áser etetin ınnovasııalyq bilim tehnologııalaryn engizýde de tıimdiligin kórsetpek.
ALMATY