QR Prezıdentiniń keńesshisi – Baspasóz hatshysy Berik Ýálı Tengrinews.kz saıtyna bergen suhbatynda Memleket basshysy Qasym-Jomart Toqaevqa BRIKS qurylymyna kirý múmkindigin qarastyrý týraly usynys túskenin aıtty, dep jazady Egemen.kz.
Berik Ýálı Qazaqstan BRIKS-tiń damý evolıýsııasyn qyzyǵýshylyqpen muqııat baqylap otyrǵanyn aıtyp, qurylymǵa kirýdiń ulttyq múdde turǵysynan utymdylyǵy sarapqa salynyp jatqanyn málim etti. Bul kóp satyly úrdis bolǵandyqtan ýaqytty qajet etedi, sondyqtan Qazaqstan taıaý bolashaqta qurylymǵa kirýge usynys bildirýden qalys qalmaq.
Sondyqtan Qazaqstan Birikken ulttar uıymyna basymdyq bermek. Búginde bul uıymnyń halyqaralyq arenadaǵy salmaǵyna qatysty saýaldar da az emes. QR Prezıdentiniń keńesshisi – Baspasóz hatshysy BUU-ǵa álemdik qaýymdastyqtyń qoldaýy aýadaı qajet ekenin atap ótti.
«Prezıdenttiń pikirinshe, BUU da kemshiliksiz emes. Biraq dál sondaı basqa uıym joq. Sondyqtan BUU-ǵa álemdik qaýymdastyqtyń qoldaýy aýadaı qajet.
BUU Jarǵysy halyqaralyq quqyqtyń negizi bolýy kerek jáne bul irgeli qujatta bekitilgen qaǵıdalardy buzýǵa eshkimniń qaqysy joq.
Prezıdent BUU Qaýipsizdik Keńesiniń mańyzdy ári taǵdyrsheshti sheshim qabyldaý isinde dármensizdik tanytyp otyrǵanyna ókinish bildirgen edi. Sondyqtan Memleket basshysy «orta derjavalardyń» múddelerin eskere otyryp, BUU-ǵa múshe memleketterdiń keń aýqymdy konsýltasııalary negizinde BUU Qaýipsizdik Keńesin reformalaýdy bastaý qajet dep esepteıdi», dedi Berik Ýálı.
Qazaq dıplomatııasy qaı uıymǵa basymdyq beretini týraly aqparatty QR Prezıdentiniń keńesshisi - Baspasóz hatshysy Berik Ýálıdiń suhbatynan tolyq oqı alasyzdar.