Atyraý oblysynda «Taza Qazaqstan» jalpyulttyq ekologııalyq aksııasy aıasynda Jaıyq ózeniniń jaǵalaýyn qoqystan tazartý áli jalǵasyp keledi. Aksııa kezinde jaǵalaýdaǵy qoqystar jınalyp, kóshetter egildi.
«Info sentr» qoǵamdyq birlestiginiń dırektory Zamanbek Quraqbaıdyń málimetinshe, kóktemgi sý tasqyny kezinde Jaıyq ózeniniń jaǵalaýyna topyraq salynǵan 5 mln-ǵa jýyq qap tóselgen edi. Sý deńgeıi tómendegennen beri ózen jaǵalaýyn tazartý jumysy júrip jatyr.
«Tabıǵatty qorǵaý aksııasy jastardyń sanasynda otansúıgishtik, týǵan elge, qorshaǵan ortaǵa janashyrlyq sezimin qalyptastyrýǵa yqpal etedi. Aksııaǵa qatysýshylar ózen jaǵasyn aramshóp pen túrli qoqystan tazartty», deıdi Z.Quraqbaı.
Jyl sońyna deıin «Taza Qazaqstan» aksııasy aıasynda 19 tabıǵat qorǵaý is-sharasyn iske asyrý kózdelip otyr. Osy kezge deıin onnan astam senbilik ótkizildi. Senbilikke 45 myńnan astam adam qatysty. Qoqys polıgondaryna 1 500 tonnadan astam qoqys tasyldy. О́tken aptada aksııa aıasynda 1 myńǵa jýyq kóshet egildi. Igilikti shara Atyraý qalasyndaǵy «Otbasy» saıabaǵynda ótti. Atyraý oblystyq ekologııa departamentiniń bas mamany Aqtolqyn Qaldybaevanyń pikirinshe, qorshaǵan ortaǵa janashyrlyq tanytatyn mundaı is-sharanyń mańyzy zor. Aksııaǵa qatysqandardyń deni – munaı-gaz ónerkásibiniń qyzmetkerleri. Sondaı-aq qala turǵyndary, sportshylar men stýdentter de qatysty.
«Aksııanyń maqsaty – ekologııalyq mádenıetti qalyptastyrý. Osyǵan oraı Atyraý qalasy men 7 aýdanda kóshet egý, qorshaǵan ortany tazalaý jumysy ár senbi saıyn uıymdastyrylyp keledi. Al tabıǵatty jasyl jelekke bóleýdiń birden-bir joly – kóshetti kóptep egý. Birinshiden, bul ekologııalyq ahýaldy jaqsartady. Ekinshiden, atmosferalyq aýa sapasyna da oń yqpal etedi», deıdi A.Qaldybaeva.
Atyraý oblysy