Jetisýda 20 myńnan astam ustaz bilim beredi. Bıyl sonyń 2 myńǵa jýyǵy memleket hám oblys tarapynan túrli marapatqa ıe boldy. Solardyń ishinde Úmbetovter áýletiniń orny erek. Naǵyz eńbek adamy deseńiz de bolady. Sebebi úlken otbasy úsh býynnan beri shákirt tárbıeleýmen aınalysyp keledi. Olardyń jalpy eńbek ótili – 332 jyl. Búginde shóbereleri de atadan qalǵan jasampaz jolmen júrip keledi.
Jalpy, Jetisý topyraǵynda muǵalimdik joldy tańdaǵan otbasy óte kóp. Kóbine eldi mekenderge bara qalsańyz, ata-anasy men balalary mektepte qyzmet etetin áýletterdi jıi kezdestiresiz. Oǵan úlgi – oqýshylarǵa bilgenin úıretip, osy mamandyq ǵıbrat alýdy maqsat tutqan – Úmbetovter otbasy. Búkil ómirin óskeleń urpaqty tárbıeleýge arnaǵan otbasynda otaǵasy Seıitbek Myrzahmetuly men onyń jubaıy Nurısha Baımyrzaqyzy ótken ǵasyrdyń 50-jyldarynda pedagogter áýletiniń negizin qalaǵan.
«Ustaz bolý – meniń bala armanym dese bolady. Osy mamandyqty tańdaýyma meniń alǵashqy ustazym sebepker boldy. Ol synyptaǵy ár oqýshynyń babyn taýyp, sabaqtardy da erekshelep, bir-birinen ózgeshe ótkizetin. Onyń oqýshyny sabaqqa baýrap alatyny meni tamsandyratyn. Sol kezde-aq men ózimdi muǵalim retinde kóretinmin. Sabaq sońynan qalyp, ustazyma dápter tekserýge kómektesetinmin. Mende oqýshylardyń bilimin baǵalaıtyn óz jýrnalym bolatyn, onda muǵalim ekeýimiz birge baǵa qoıatynbyz. Ustazymnyń osyndaı sabaq berý tásilderi meniń muǵalim bolýyma áser etti», deıdi áýlet úlkeni Seıitbek Myrzahmetuly.
Atalǵan áýlettiń kishkentaı balalary da bolashaqta muǵalim bolýdy armandaıdy. Búginde otbasynda 11 pedagog – segiz matematık, úsh bastaýysh synyp muǵalimi, bir fızıka muǵalimi bar. Máselen, otaǵasy Seıitbek Myrzahmetuly 41 jyldyq ustazdyq qyzmetinde matematıka páni muǵaliminen Lesnovka, Sosjol aýyldarynda mektep dırektorlyǵyna deıingi joldy júrip ótken. Odan keıin taǵy 20 jyl Qońyróleń aýylyndaǵy orta mektepte dırektordyń oqý isi jónindegi orynbasary bolypty. Talaı jylǵy eńbegimen elenip, eldiń qoshemetimen sol jerden qurmetti eńbek demalysyna shyqty. Onyń jubaıy, otbasynyń uıtqysy, «Altyn alqa» ıegeri Nurısha Baımyrzaqyzy Basshı, Lesnovka, Sosjol, Qońyróleń aýyldaryndaǵy bastaýysh mektepterde eńbek etken. Jubaıyna demeý bola otyryp, ol mekteptegi mindetterin, segiz balany oqytý men tárbıeleýdi qatar alyp júrdi.
«Muǵalim mamandyǵynyń eń qıyny – damyp otyrýǵa degen qajettilik. Muǵalim qashanda óziniń bilimi men biliktiligin shyńdap otyrýy kerek. Bul ońaı emes, buǵan shydamdylyq, alǵa qoıǵan maqsatyńa umtylý qajet. О́zin jeke tulǵa retinde damytý kerek. Zamanaýı muǵalim damymasa, toqyraýǵa ushyraıdy», deıdi N.Baımyrzaqyzy.
Ata-anasyna qarap boı túzegen qyzdary Ardaq, Nurgúl, Baqytgúl, uly Marat pedagogıkalyq ýnıversıtetterge oqýǵa túsip, matematıka pániniń muǵalimderi atandy. Qazirgi tańda Ardaq pen onyń jubaıy Baımuhan Nurmuhamedov – bilim salasynyń eńbek sińirgen ardagerleri. Nurgúl 25 jyl boıy Qońyróleń orta mektebinde matematıkadan sabaq berdi, al qazirgi ýaqytta M.Gandı atyndaǵy №92 Almaty lıseıinde jumys isteıdi. Baqytgúl B.Momyshuly atyndaǵy gımnazııada sabaq beredi. 41 jyl bastaýysh synyp muǵalimi bolǵan jáne úlken otbasynyń kelini, Seıitbek Myrzahmetulynyń úlken uly Bolattyń jubaıy Jańyl О́tegenova, onyń qyzy Maqpal Abaı atyndaǵy Qazaq pedagogıkalyq ýnıversıtetin bitirgen.
Uly Marat pen onyń jubaıy Gúlnazıra Ospanbekova Qońyróleń aýylynda Qojbanbet bı atyndaǵy orta mektepte otyz jyl boıy matematıkadan sabaq berdi. Bir ujymda ıyq tirese jumys isteı otyryp, erli-zaıyptylar úlkenderdiń danalyǵy men ósıetterin jas urpaqqa sińirýge tyrysady.
«Otbasyn qurǵannan keıin ata-analarymyz mektepte tynbaı jumys istedi. Ákemiz ben anamyz elimizdiń laıyqty azamattarynyń birneshe urpaǵyn tárbıelegenin maqtan tutamyz. Qanshama ter tógip eńbek etse de, olar bizdi de nazardan tys qaldyrmaı, ultymyzdyń úzdik dástúrlerin boıymyzǵa sińirdi. Men ákemniń isin jalǵastyrǵanyma shyn júrekten qýanyshtymyn. Búgin men mamandyq tańdaýda qatelespedim dep senimdi túrde aıta alamyn, ustazdyq jol – meniń armanym ekenine kózim jetti. Sondaı-aq tek oqytyp qana qoımaı, únemi izdeniste bolý, jańa bilimdi meńgerý óte mańyzdy, zaman aǵymynan qalmaı, kreatıvti oılaý qajet. Jastar – elimizdiń bolashaǵy, sondyqtan biz aǵa býyn retinde ata-babalarymyzdyń baı mádenı murasyn saqtap, balalarǵa berýimiz kerek, naǵyz patrıottyq rýhta tárbıeleýimiz qajet. Ustazdyń basty maqsaty men mindeti de osy», deıdi M.Seıitbekuly.
Panfılov aýdanyndaǵy muǵalimder áýleti eńbegi men kásibıliginiń nátıjesinde kóptegen qurmetti marapatqa ıe boldy, biraq olar úshin eń bastysy – oqýshylarynyń bıikten kórinýi. Bul áýlet jetken jetistigimen shektelip qalmaıdy, izgi isterin odan ári jalǵastyrýǵa nıetti. Marat Seıitbekulynyń qyzy Ámına bolashaqta úlkenderdiń jolyn jalǵamaqshy. Mektepti «Altyn belgige» bitirip, Ál-Farabı atyndaǵy QazUÝ-da «matematıka» mamandyǵynyń memlekettik grant ıegeri atandy.
Jetisý oblysy