О́tken aptada dollarǵa qatysty teńge baǵamy birshama joǵarylap, 490-ǵa deıin taıady. Tipti sarapshylar arasynda baǵam 500-ge jetýi múmkin degen boljamdar da aıtyla bastaǵan. Biraq keıin qaıta tómendep, 1 dollar 487 teńgege saýdalandy.
Sarapshy Murat Temirhanovtyń aıtýynsha, Ulttyq bank zeınetaqy qorynan dollar satyp alýdy toqtatýdyń ornyna, teńgeni joǵary baǵamen satylymǵa shyǵarǵan. Bul BJZQ ınvestorlarynyń múddesine qaıshy keledi.
«Ulttyq banktiń baǵamdyq saıasaty der kezinde jaýap berse, teńge osynshalyqty álsiremes edi. Bul halyq pen bıznestiń devalvasııalyq kútýine keri áserin tıgizedi. О́z kezeginde ulttyq valıýtaǵa degen senimsizdik ulǵaıyp, teńgeniń álsireýine ákeledi. Bas bank naryqta teńgeniń kúrt álsireý sebebin túsindirmeı otyr. Teńgeniń naryqtaǵy ótimdiligi tómen, qatysýshylar sany az, elimizdiń bırjasynda valıýtaǵa suranys pen usynys arasynda iri teńgerimsizdik oryn alyp otyr. Bul naryqtaǵy teńge baǵamynyń joǵary qubylmalylyǵyn týdyrady. Mundaı jaǵdaıda Ulttyq bank teńgeni basqarýdaǵy ózgermeli tártipti qoldanyp jatqanyn resmı túrde moıyndaýy kerek», dep esepteıdi Temirhanov.
Ekonomıst Ǵalymjan Aıtqazınniń aıtýynsha, teńgeniń qazirgi jaǵdaıy elimizdiń ishki ekonomıkalyq máselesiniń kórinisi.
«Geosaıası jaǵdaılar, munaı baǵasynyń quldyraýy nemese 2020-2022 jyldar aralyǵynda bolǵan pandemııa sekildi syrtqy kúızelis bolǵan joq. Ishki faktorlar retinde bıýdjet kirisiniń álsireýin, birinshi jartyjyldyqta Úkimet Ulttyq qordan respýblıkalyq bıýdjetke aýdarǵan transfertin aıtýǵa bolady. Olardyń konversııasy Ulttyq banktiń KASE bırjasynda aıyrbas baǵamyna qysym jasap, onyń kúsheıýine ákelgen. Bıýdjet kirisin tolyqtyrý jáne Ulttyq qordaǵy munaı dollarlaryn tıimdi baǵamǵa aıyrbastaý úshin bizge teńgeniń qunsyzdanǵany qajet. Osy jyldyń transfertteri taýsyldy. Bizdegi bıýdjet kirisinde kúrdeli másele jeterlik. Olardyń ornyn jabýda barlyq quraldy, sonyń ishinde valıýta baǵamyn álsiretýdi de paıdalanǵan», deıdi Aıtqazın.